قصائد متنوعة - الأكثر قراءة

يابن خالي

الزيارات: 6939

تقييم المستخدم: 0 / 5

تعطيل النجومتعطيل النجومتعطيل النجومتعطيل النجومتعطيل النجوم
 

يابن خالي غصب عني

الكلام كله مخاصمني

ما أنت برضه لو مكاني

كنت تبقى زي مني

مش هقولك إيه ف بالي

صعب تفهم مُر حالي

و جرح قلبي يابن خالي

يابن خالي مد إيدك

إمسح الدمع اللي سايل

لو صحيح إني حبـيبك

قولي ليه البخت مايل؟

ليه بيرخص كل غالي؟

ليه بيوطى حد عالي؟

ليه جاوبني يـابن خالي

يابن خالي

إعتبرني زى أخوك

و لا أقولك لأ بلاش

كان لي أخ راح ما جاش

لما عوزته جنب منـي ملقتوش

يـعني ميت و لا عـاش

سر لسه معرفوش

يابن خالي إلحقني حوش

وحدي بغـرق ف الهموم

كل ساعه وكل يوم

وأما أنام نفس الكابوس

زي غول بقت الفلوس

فوق جتتنا فات يدوس

يابن خالي الدنيا ضلمه

والطريق مفهوش فانوس

يابن خالي الأخ كلمه

مش لاقيها ف القاموس

قول جاوبني يابن خالي

و لا صعـب عليك سؤالي؟

طب هقوله مره تانيه

يا أبن خالي إزاي ف ثانيه

يبقى فجأه الدم ميه

نفسي تفهم اللي بيّا

و لا أقولك هي هي

الحياه آخرتها فانيه

مات أبويا و مات أبوك

ناس فاتوني وناس فاتوك

ناس لقبري هـيشيلوني

وناس لقبرك هيشيلوك

مين هيسبق؟

مين هـبقى أولاني؟

مش هتفرق

كنت أول و لا تاني

بس إوعي إياك تـصدق

إني كنت ف يوم أناني

يابن خالي إلحقني بغرق

جوه غربه عايزه تسرق

اللي فاضل مني باقي

جرح قلبي نار بتحرق

قولي مين هيداوي دائي

يابن خالي بص دقق

اللي يدي راح يلاقي

إقرا إيه ف سطوري حقق

والنوبادي قرار نهائي

يابن خالي الدنيا ضلمه

والطريق مفهوش فانوس

يـابن خالي الأخ كلمه

مش لاقيها ف القاموس

0
0
0
s2smodern