إنتفاضة الأشعار - الأكثر قراءة

هدى

الزيارات: 538

تقييم المستخدم: 0 / 5

تعطيل النجومتعطيل النجومتعطيل النجومتعطيل النجومتعطيل النجوم
 

زيك كرهت رمل الشط

و كرهت ألوان الشماسي

لاقيتني بغرق في بحور من صمت

و لا عُدت قادر ألتقط أنفاسي

بقيت أخاف م البحر

و أكره صورة المراكب

برُه لقيته قبر

إدفنوا فيه حبايب

نزلت دموعي يا هدى

كان نفسي أجاوبِك ع الندا

و رغم إن بينا كان مدى

لكن قتلتني دموعك

عذبني ألمك

اللي حسيته ف ضلوعك

هزت كياني

كل صرخه من صراخك

تهت ف مكاني

و لاقيتني هناك مكانك

و كأني وحدي بس

عارف شدة مرارك

مسروقة مني الشمس

اللي سرقوها ف نهارك

عمالي أصرخ و أبص

و القلب يبكي عشانك

مستني ضمير يـحس

و يكون رد لسؤالك

حسيت بذل العجـز

و إتخيلت بخيالك

كل الضماير خُرس

و لا حد همُه حالك

سمعوا صراخك همس

و كانوا يتمنوا إغتِيالِك

باعوكي زي ما أمس

باعوا بسكوتهم ديارك

رخصت خلاص النفس

شجب و إدانه هيكونوا عزائك

مش أكتر من كدا

نزلت دموعي يا هدى

بصرخ معاكي و أترمي

فوق الرمال

زي الدبيح تتألمي

و أنا لسه محسوب ع الرجال

عايزك يا بنتي تفهمي

أنا زييهم مُدان

أنا يعني إيه عملت؟

كـلـمـتـيـن لـيـكـي كـَتـبـت؟

الكلمه مبتِمسحش دمع عين

و لا بتعيد اللي كان

الكِلمه مبتخُدش بالإيدين

و لا بتطهر مكان

لكن أقولك إيه؟

حالنا و إنت طبعاً تعرفيه

بقينا يا صغيرتي لسان

أصبحنا صوت مالهوش صدى

و يومين تلاته بالكتير كمان

و تصير حكايتك شئ مضى

قدرك يا بنتي و قسمتك

تمشيها وحدك سكتك

و يضيع صراخنا في الفضا

ما أنا أصلي وياكي صرخت

و دموعي نزلت يا هدى

و زيك كرهت رمل الشط

و كرهت ألوان الشماسي

لاقيتني بغرق في بحور من صمت

و لا عُدت قادر ألتقط أنفاسي

0
0
0
s2smodern