إنتفاضة الأشعار - الأكثر قراءة

و إنت بتقول الشهاده

الزيارات: 768
تعطيل النجومتعطيل النجومتعطيل النجومتعطيل النجومتعطيل النجوم
 

و إنت بتقول الشهاده

أنا كنت شايفك حي .. و شايف نفسي ميت

إنت الزمن اللي جى .. و أنا سنيني اللي مرت

و إنت بتقول الشهادة

لاقيتني زي العبد .. لاقيتك إنت السيد

إنت كرامه و مجد .. و أنا بالذل متقيد

دمك بيروي الأرض .. و أنا دمي متجمد

رايح تقابل رب .. و الجنه ليك موعد

طريقي ليها صعب .. و إنت عليها بتورد

عايش أنا بالغصب .. ع الظلم متعود

ما أنا مسلوب الإراده .. و خنوعي بقى عاده

و إنت بتقول الشهادة

و إنت بتقول الشهادة .. شوفتك بطل

حسيت ساعتها .. إن لسه فيه أمل

أيوه صحيح غالي التمن

بس الحياه بتساوي إيه

لوعشنا فيها بدون وطن

أنا كنت شايفك .. و إنت رافع أعلى رايه

و بصوت شفايفك .. قلت لينا أغلى آيه

خلتني حاسس مره تاني .. السكوت معناه خيانه

معرفش ليه الإحساس دا جاني

أصبحت خايف إني أشوفني ف المرايه

ما أنا أصلي عارف إني جاني

غرقني دمك اللي طرطش فوق هدومي

بقى صعب نومي

أصبحت خايف كل يومي

ما بقتش عارف إمتى هرتاح منه لومي

أنا لازم أنسى أحاسيسي الجبانه

من بعد غزه و بعد صابرا و بعد قانا

ما بقاش يكفي يبقى ردي طول بكايّا

أنا مادد يدي .. و فيه ملايين مادين ويايّا

مبقولش لوحدي .. فيه ملايين بِيقولوا معايّا

أرضك ديه أرضي .. و لازم ترجع لينا ف أي نهايه

و ضد المحتل يا ساده .. أو حاكم ظلمه زياده

الكل خلاص آهُو نادى .. طلب الحريه عباده

و إنت بتقول الشهاده

ألحان ياسر سليم

شاهد الفيديو كليب بصوت الفنان حميد الشاعري

رابط للإستماع أو تحميل الأغنية

شاهد الشاعر في تسجيل حي

بدأت مجزرة غزة في 22.12.2008

0
0
0
s2smodern