إنتفاضة الأشعار - الأكثر قراءة

الحكم باطل

الزيارات: 782
تعطيل النجومتعطيل النجومتعطيل النجومتعطيل النجومتعطيل النجوم
 

 

محكمه ولا إحتِلال؟

مشنقه و لا إغتيال؟

يا مأيدين القاتل

إحنا و إنتوا مقتولين

ما بقاش خلاص فاضل

فيه قيمه للقوانين

دا أحنا ف زمن فاجر

حاكمينه سفاحين

ف حقوقنا بتّاجر

و تذلنا و تهين

عيدك سعيد عيدك مبارك

وصلت رساله من بعيد

مكتوبالي و مكتوبالك

م النهاردة كل عيد

تفتكر يوم إمتِهانك

تفتكر ذُلّك .. هوانك

كل عيد يبقى ف خيالك

صورة الأخ اللي خانك

و اللي باعك

كل عيد هتشوف وطن

ما بقاش بِتاعك

كل عيد تدفع تمن

من خير بلادك

من كبرياءك

من دماءك

من دموع بلت رداءك

غصب عنك ـ ـ بإختِيارك

القرار ما بقاش قرارك

طُول ما حالك هو حالك

الطريق هتشوفه حالك

كل يوم هيزيد مرارك

كل عيد هيفوت عليك

تفتكر ظلم إحتلالك

تبقى متشوق لدارك

لإبتسامِة إبن جارك

كل عيد و إنت ف صلاتـك

و إنت سامِع صوت آدانك

و إنت بتطوفه طوافك

لما تنشد تكبيراتك

لما تدعي رب قادر

رب عادل

تبقى فاكر

الضحايا و الدم اللي سايل

كل ست و كل طفل و كل راجل

و اللي هاجر

و اللي صار في الدنيا حاير

و اللي قاوم و اللي ناضل

مش هتقدر لو تحاول

مهما كانت العوامل

حتى لو قصدك تجامل

أو لسانك خاف و ماطل

صوت ضميرك يبقى قايل

الحُكم دا باطل

الحُكم دا باطل

0
0
0
s2smodern