إنتفاضة الأشعار - الأكثر قراءة

تخاريف الخريف

الزيارات: 849
تعطيل النجومتعطيل النجومتعطيل النجومتعطيل النجومتعطيل النجوم
 

عايزك براحه بدون تكثيف

لو ناوي تخرف كون كييف

علشان بصراحه بدون تكليف

بقى غيرنا يخرفلنا ع الكيف

و بكل بجاحه يوماتي يضيف

و علينا يزود ف التكاليف

مش عايزه نصاحه بلاش تأليف

مين يعني هيدفعها المصاريف

و لا ناقصه فصاحه يا أبو العُريف

و بلاش بقى تغلَط ف التصنيف

و إياك تتلخبط أو تِتغر

دا أنا قصدي شريف و ضميري نضيف

و لا بفهم خالص بعد الشر

فبلاش يا خفيف تعمل حريف

و إن عدت كلامي بلاش تحريف

د أن كان ليه معنى

إحسبه تخاريف

تخاريف الخريف

تخاريف يا خريف نبرد ف الصيف

و نموت ف الشتا من عز الحر

و إن جيت ياربيع ندبل و نضيع

و مافِيش و لا غيط عندنا يخضر

تطبيع و كويز دخلوا القواميس

و إتشالِت منهم كلمِة حر

بقى أي وضيع يشتري و يبيع

و يتاجر فينا كمان بالأمر

إتنِين إخوات يبقوا عدوين

و الحلو ما بينهم يصبح مر

و نعيش أموات و نموت عايشين

و لا حدش عارف إيه السر

مش برضه دي حاجه تعر؟

واخدين شهادات إنما عاطلين

و كمان عندنا أصحاب ملايين

ما أحناش شمال و لا إحنا يمين

و بقالنا سنين على كدا تايهِين

و ف كل مجال كلنا فاهمين

بس إحنا بِنعمِل مش عارفين

ع الشاشه رجال و أسود واقفين

و نروح البيت نمضي موافقين

و ساعات مرسال بيكون سطرين

علشانه نغير ف القوانين

و آيات تِتشال من كتب الدين

و إن قالوا إلغوه هنكون راضيين

و إن مره كلام كتبوه معارضين

الـكاتب يبقى من المساجين

و نقول أبطال على ناس فاشلين

و بنرضى الخونّه يكونوا حاكمين

و تكون عربيتهُم بالتكييف

و إحنا ما نلقاش رغيف .. و لا حتى نواية تمر

فقر ما منوش مفر

أنا قصدي شريف و ضميري نضيف

و لا بفهم خالص بعد الشر

فبلاش يا خفيف تعمل حريف

و إن عدت كلامي بلاش تحريف

د أن كان ليه معنى

إحسبه تخاريف

تخاريف الخريف

0
0
0
s2smodern