إنتفاضة الأشعار - الأكثر قراءة

غالي و الله التمر

الزيارات: 822
تعطيل النجومتعطيل النجومتعطيل النجومتعطيل النجومتعطيل النجوم
 

 

مش بس النفط غالي

دا غالي و الله التمر

و غاليه كل نقطة ميه

من نهر الفرات

و نظره م العيون السُمر

و ضحكه فوق شفايف البنات

و غالي قلب مليان بالحنين

و غاليه بطن جواها جنين

من حقه في أمان يتولِّد

يبقى بشر

و يكونلُه في الدنيا مكان

و الإنسانِيه تنتصر

على فرعون الزمان

يتعدل تاني الميزان

ما يكونش النفط أغلى من بني الإنسان

و لا من حلم الطفوله

و لا من زرع الغيطان

و لا أغلى من دموع العين

و لا أغلى من تراب

إرتوى بدم الحسين

زينة شباب الجنه

حفيد النبي

و زهرة الشهداء

غاليه كل العراق

و غاليه كل نقطة دم

نزفت من أبرياء

غاليه علينا أم

حرموا ضناها الدواء

و جرح الضِنا حراق

يعرفوا بس اللي داق

قالت آلامك زي النار بتكويني

نفسي بدالك

أشوفك طبت يكفيني

ولدي على عيني

لا قادر يا حبيبي تنام

و لا تاكل و لا تشرب

ضنايا مهما قُلت كلام

و مهما وصفت إيه أصعب؟

ولدي إيديّا مش طايله

و أحوال أمتك مايله

لا لاقيّه فيهم مُعتصم

و لا شايفه صلاح الدين

ولدي فؤادي بِيتقسِم

أنده على مين؟

نفسي أشوفك تبتسم

و عنيك مِطمِنِين

و يطمن عليك بالي

و يفضل نخلنا عالي

و أوراق الشجر تخضَّر

مش بس النفط غالي

دا غالي و الله التمر

غالي و الله التمر

رابط تحميل القصيدة

0
0
0
s2smodern