إنتفاضة الأشعار - الأكثر قراءة

آلوووووه ياقمم

الزيارات: 477

تقييم المستخدم: 0 / 5

تعطيل النجومتعطيل النجومتعطيل النجومتعطيل النجومتعطيل النجوم
 

إحنا العرب

بقى صعب نشعر بالغضب

لو نتظلم أو نضِّرب .. ولا إتلسعنا ميت قلم

من خير بلادنا نِتحرم .. ونقول دي نعمة م النعم

فوقنا بيوتنا تتردم .. فنحط على طوبها علم

قال يعني غيظنا اللي هدم .. وإحنا اللي أموات م الألم

إحنا اللي حافظين م الحِكّم .. حكمه نقولها ونتكتم

بنعيدها و إحنا بنبتسم .. لا يدوسوا فوقنا بالقدم

من خاف سلم

واللي ماخافش

يتعدم

آلـووووووووووووه

آلـوووووه ياقمم

 

مابقاش في لينا .. أي إحساس بالكرامه

وإن روحنا – جينا .. ما بتلقلناش علامه

على بعض نحسب .. أي هفوة وأي غلطة

ونقول و نكدب .. إن لسة ف إيدنا سُلطة

طب دا أحنا حتى .. إتقسمنّا ألف حتة

بقوا دُول ممانعة .. ودُول معاهدة

ودُول ف جامعة .. ودُول معارضة

والحبة دولا إعتدال .. ويّا الصهاينة مافيش قتال

واللي باقيين حبة حبة .. يوم عداوة ويوم محبة

مره يبقوا في اليمين .. مره تانيه في الشمال

ودولا حالفين اليمين .. الود بينا شئ محال

واللي في القمة إحتمال .. يردحوا زي العيال

فيقولوا عنها قمة سخنة .. واللي فاتت قمّة باردة

وبعد اللي جاية قمة حلوة .. قبل منها قمة حادقة

وهتيجي قمة للعزا .. بعد القمة اللي ماتت

ودي قمة عال وكويسة .. بس ف آخرها باظت

والقمة ديّا للمساعدة .. ودي قمة عاملينها مساندة

ودهي موافقة وديّا رافضة .. والقمة ديّا بدون مناسبة

ودهي كمالة قمة سابقة .. ودي قمة داخلة في المسابقة

ولا حد بيقول كلمة صادقة .. لحسن يحاسبوه العجم

آلـووووووووووووه

آلـوووووه ياقمم

 

ما بقتش فارقة إن موتنا جوع .. أو حتى موتنا غيظ وحرقة

فوق حيط وطنّا تسيل دموع .. وتضيع حقوقنا غصب سرقة

إحنا اللي قدنا زمان شموع .. صبحت حياتنا ضلمة  غامقة

كنا أحنا أصل والباقي فروع .. دلوقتي عايشين عيشة خانقة

من كتر خوفنا بقينا طوع .. وكلامنا كله صار منافقة

بنبوسها إيدين الجربوع .. ونموت ف عيونه الزرقة

قلبنا بيكون موجوع .. ونعامله بذوق و رقة

إنما مع بعض عداوة .. ومافيش للأخ غلاوة

وجيوشنا إن كانت نايمة .. على بعض بتصبح قايمة

ونحارب بعض بهمة .. وزي الأساتك الذمم

آلـووووووووووووه

آلـوووووه ياقمم

 

ميت آهة وألف ألف خسارة .. على حالة خَير أمة

كنا النور و المنارة .. وبقيت العالم في الضلمة

كنا صحاب الحضارة .. كلمتنا أشد كلمة

أصبحنا و بجدارة .. بنطاطي بدون مقاومة

وبقينا بكل حقارة .. بالأمر ننفذ أي مهمة

بقى ممنوع نتولد .. لكن ممكن نموت

مش مسموح نتحد .. أو نلغي ما بينا حدود

نطلب حرية تترفض .. وخلاص مابقاش لينا صوت

منهم لله خنقوه .. حكامنا الخونة ودفنوه

والكرسي اللي إحتلوه .. تقريباً كدا عبدوه

دول حتى في منهم كتبوه .. للواد من بعد أبوه

والشعب دوره يقول نعم .. لأي حاكم م الرمم

آلـووووووووووووه

آلـوووووه ياقمم

0
0
0
s2smodern