بحبك يا مصر - الأكثر قراءة

إيه اللي وصلنا لكدا؟

الزيارات: 198
تعطيل النجومتعطيل النجومتعطيل النجومتعطيل النجومتعطيل النجوم
 

إيه اللي وصلنا لكدا

مين السبب ف اللي إحنا فيه

مين اللي بالغدر إبتدا

و ف دمنا غرقت إيديه

مين اللي خلا المحتمل

يبقى أكيد

مين اللي جه سرق الأمل

وخنق الحلم الوليد

مين اللي كان عامل بطل

وطلع أبلد بليد

مش شايفة عينك فين وصل

الفرق بين سادة وعبيد

شوف للوطن إيه حصل

وأسأل وقولي مين سعيد

رد بضميرك لو جدع

إنسى كلام اللسان

مش برضه حاسس بالوجع

ولا أنت مش إنسان

ميكونش صوتك أتحبس

أو صرت م العميان

عيد الحكاية وماحدث

يمكن تلقى العنوان

بس أستعيذ من الخبث

وأطرد مرة الشيطان

دول تاجروا حتى في النفس

و ف نجدة العيان

 ولا أنت  راضي بكل دا؟

إيه اللي وصلنا لكدا؟

طب قولي حاجة فيها حاسس بالرضا

دا أحنا بقينا بنتشتم من دا ودا

أحنا اللي كنا قبل مايكونوا هنا

آه وربنا

إحنا اللي أول يوم مابانوا

إتمنوا يبقوا زينا

إحنا اللي بينا إستعانوا

والعُلما كانوا مننا

إحنا اللي منا إستدانوا

والكسوة كات من عندنا

كنا أحنا مصر وهم كانوا

مايجوش نقطة ف بحرنا

كان كل واحد عارف فين مكانه

وفين عِلمهم من عِلمنا

كنا المهندس والمحاسب والأديب

كنا المدرس والمحارب والطبيب

كنا وطن فاتح بيبانه

بيعيشوا بينا ف وسطنا

والله ما أقصد تجريح أو إهانة

دول مهما كانوا أهلنا

وإن حد مرة شتمنا فيهم

بالذوق نقوله ردنا

دول هم لينا وإحنا ليهم

منهم وهم مننا

ولا كان في عندي أي نية أني أغلط

أو سِنة أقلل مِنْهُم

أنا كل قصدي أني أشهد

للي صار لأحوالهم

أنا قصدي أستغرب على حالنا

وليه وإزاي كدا وصلنا؟

يرضيك حقيقي اللي أحنا فيه الوقت دا؟

إيه اللي وصلنا لكدا؟

عيد الحكاية وماحدث .. يمكن تلقى العنوان

بس أستعيذ من الخبث .. وأطرد مرة الشيطان

دول تاجروا حتى في النفس .. و ف نجدة العيان

0
0
0
s2smodern