بحبك يا مصر - الأكثر قراءة

حلولوينا

الزيارات: 130
تعطيل النجومتعطيل النجومتعطيل النجومتعطيل النجومتعطيل النجوم
 

 

مين فيكم ماأشتراش .. من عنده مسطرة

أو لما أحتاج مالقاش .. برجل أو منقلة

طب مين أشترى أستيكة .. أو جاب فرخين جلاد

أو خد كراسة مزيكا .. طلبتها أبلة وداد

أو جاب للفصل زينة؟

من عند حلولوينا

 

مين جاب من عنده ميكي .. أو تان تان ولا سمير

ولا مغامرات الخمسة .. وتلاتاشر شياطين

مين حجزت عنده البوردا .. أغلى مجلة تفصيل

أو مين مع بابا عدى .. واشترى بمب وبلالين

في طريقهم للجنينة

من عند حلولوينا

 

حلولوينا كان .. أول وأشهر دكان

وكانوا أعمامي وأبويا .. يعرفوا كل السكان

وأنا رأيي خطوة أولى .. علشان نرجع زمان

أرسم بكلامي صورة .. كان إيه شكل المكان

كان جنبه كهربائي .. لو يوم نوركم فصل

وكمان كان فيه ساعاتي .. وورشة للعجل

ع الناصية كان بقال .. بيبيع بسطرمة ومش

ومطعم فول لو شغال .. وأحتجت لسندوتش

غير حلاق ع الشمال .. لازق ف بتاع كاوتش

ومحل بيعمل براويز .. بإزاز مبيتكسرش

وقهوة يوم الخميس .. على غيرها مبنقعدش

جنبيها كان جزار .. اللحمة بتاعته فريش

بعديه على طول عطار .. تقريبا مبيقفلش

وبتاع فاكهة وخضار .. لزباينه عمره ماغش

 

وكمان كان فيه سمسار .. لو عايز شقة بعفش

أو على راحتك تختار .. وتقوله يشيل الفرش

وفيه فرن أكيد عارفينه .. كان عيشه مايتكررش

إن كان كايزر أو فينو .. مهمن كلت متشبعش

كانت العيشة رواقة .. والدنيا ماأتزحمتش

وكانت صورة البطاقة .. أيامها متخوفش

كنا بنخاف عليها .. وعشان ماتتكرمش

نشتري تغليفة ليها .. بحوالي تلاتة قرش

سولوفان لكن متينة

من عند حلولوينا

 

كان فيه للدقي عمدة .. ومقام للشيخ عِتمان

دي حقيقة بجد ومش نكتة .. طب أقولك حاجة كمان

في الدقي ماكانش محطة .. ولا كان فيه لسة مدان

حتى الأوتوبيس أبو شرطة .. ماكانش لسة بان

وقبل مايبدأو بالخطة .. يومها بتوع الإسكان

كان لسة الدقي نقطة .. خضرا ومليانة غيطان

كان شجرُه بيفرش ضلة .. بتضلل ع الحران

والمية ف زير أو قلة .. يرتوي بيها العطشان

الكارو كان مواصلة .. وركوبة للغلبان

واللي ساكن في فيلا .. أو قصر عنده حصان

 

كان يومها الدقي أحلى؟ .. أو أحلى الدقي الآن؟

لو قلت إجابة سهلة .. فأنا هبقى أكيد غلطان

صعبة بجد المحاولة .. محتاج الرد ميزان

أو جايز جوا مجلة .. ولا ف صفحة جرنان

هنلاقي جواب يرضينا

من عند حلولوينا

0
0
0
s2smodern