بحبك يا مصر - الأكثر قراءة

حد فاكر

الزيارات: 351
تعطيل النجومتعطيل النجومتعطيل النجومتعطيل النجومتعطيل النجوم
 

السؤال الإعتيادي

اللي أول كل بوست

اللي بيفتش ف ماضي

عشتوا فيه وأنا برضه عشت

حد فاكر؟

 

كل مرة أقراه ألاقي

أن عمري اللي فات

أحلى من عمري اللي باقي

والرجوع للذكريات

كان دوا محتاجُه دائي

غصب عني فيه حاجات

ليها بيزيد إشتياقي

صوت أبويّا اللي مات

ونفسي بينا يكون تلاقي

وحضن أمي وحكايات

تحكيهالي بحس هادي

بس أنا في كل الحالات

باللي قسمُه ربي راضي

ومش بعاند أو أكابر

حد فاكر؟

 

السؤال مافهوش حاجة

شكله عادي .. مش غريب

بس مسلوب الإرادة

الجواب بلاقيه عجيب

هو أنا لو كنت ناسي .. كنت جيت؟

طب دا أنا مش مالي راسي

وفوق لساني غير ياريت

ألقى نفسي وسط ناسي

و ف طريق أنا فيه مشيت

طب دا أنا أنساها نفسي

لو صحابي يوم نسيت

أبقى واحد تاني عكسي

لو بعيد عنهم بقيت

يعني فاكر كل حاجة

ده جوابي ع السؤال

أيوا فاكرالبراءة

لما كنا زمان عيال

وأما طلعّت البطاقة

وأتحسبت ع الرجال

أيوا فاكر لسة بيتنا القديم

لسة فاكر ناس حارتنا

والجيران الطيبين

فاكر الناصية بتاعتنا

اللي جَمعتنا سنين

وأما كنا نعلي صوتنا

ونبقى حبة مزعجين

يتفتح شباك جارتنا

فجأة وأحنا سرحانين

وهوبا ينزل كله فوقنا

جردل المية اللعين

كان عقاب لو قل ذوقنا

نرجع البيت مبلولين

وننشر هدومنا ع المناشر

حد فاكر؟

 

أيوا فاكر كل سكة

مشيتها إمتى .. وروحت فين

طب دا أنا منستش حتى

كنت فيها ويّا مين

أيوا فاكر كل حتة

وكل صوت البياعين

اللي بيقول روبابيكيا

واللي بيبيع نفتلين

واللي ينده ياض يابلية

وصوت شاكوش النجارين

وأما قامت مرة عاركة

شفتها بين قهوتين

كات خناقة سببها كنكة

إختفت مع فنجانين

بس خلصت برضه فجأة

بعد دوشة حبتين

كان خناقنا أيامها سَكة

آخره هُما كلمتين

ياجماعة إهدوا حبة

صلوا على طه الأمين

تاني تظهر المحبة

ويبوسوا بعض مدمعين

من غير قواضي .. أو محاضر

حد فاكر؟

 

أيوا فاكر صعب أنسى

الإذاعة لما بصحى

لما صوت هادي يناديك

قبل ماتفتّح عينيك

ياعزيزي المستمِّع

بصبح عليك

بعديها تبدأ تستمتِّع

لبداية شيك

(غمض عينيك وأمشي .. بخفة ودلع

الدنيا هي الشابة .. وأنت الجدع)

أيامها كانت كل حاجة بالسمع

كانوا كلمتين وبس

بيغيروا في المجتمع

والساعة خمسة هس هس

الست هتغني

يا إما قصة الأمس

يا إما ياظالمني

ولا يمكن لسة فاكر

حد فاكر؟

 

أيوا فاكر اللي راح

واللي عدى غصب عني

لما كان الكون براح

والحبايب جنب مني

 

فاكره طابور الصباح

وطابور العلبة السوبر

فاكر التهاني والأفراح

في نصر أكتوبر

فاكر زينة رمضان

والفوانيس والكنافة

وأما هلال العيد يبان

وطلعة القرافة

فاكر كل اللي كان

المفرح والحزين

مش ناسي أي مكان

ولا هبقى م الناسيين

ياريته في الإمكان

ياريت كان بالإيدين

نقدر نرجع زمان

ونبقى صغيرين

على طول أنا كنت الآن

من أول الراجعين

أو حتى م الأواخر

حد فاكر؟

0
0
0
s2smodern