بحبك يا مصر - الأكثر قراءة

نفسي أشوفها أحلى مصر

الزيارات: 38
تعطيل النجومتعطيل النجومتعطيل النجومتعطيل النجومتعطيل النجوم
 

اللي بينك و اللي بيني

صدقيني إسمه حب

دا أنت روحي ونني عيني

ياللي ساكنه كل قلب

فلو سمحتي إسمعيني

حسي بيا وبحنيني

إفتحي دراعك خديني

ورغم بُعدي قربيني

قولي حاجه .. طمنيني

قولي بعد العسر يسر

قولي فرجه قريب يا مصر

 

مصر والله بحبك

وإسألي نيلك وهرمك

إسألي الزحمه ف شوارعك

والجريده اللي ف مطابعك

إسألي الأمواج ف بحرك

والشماسي و رمل شطك

إسألي مكن المصانع

والغيطان والليل وفجرك

إسألي كنيسة وجامع

وإسألي الدوشه وهمسك

كل حاجه راح تجاوبك

إني متشوق لحضنك

نفسي أشعر إني إبنك

وإن أنا بكره اللي جايلك

نفسي أحس ف مرة إنك

واخدة بالك م اللي حَبك

م اللي جوا قلبه كاتبك

واللي أمله يبقى شايفك

بعد نصر رايحه نصر

وحلمه تبقي أحلى مصر

 

مصر من غير اللي خانك

واللي هُنتي عليه وهانِّك

مصـر من غير اللي باعك

واللي ضيِّع خير ولادك

واللي هرَّب حر مالك

واللي ولع نار ف قيمتك

واللي عرا لحم بنتك

واللي وسَّع للجمال

واللي خلى طعم حالك

مُر فوق الإحتمال

نفسي تبقي للي شالك

جوا عينه و إدهالك

للي جاد بالروح عشانك

وإرتوى بدمه ميدانك

تبقي للي يهمه حالك

واللي بعد الغيبه جالك

جه وقالهالك صراحه

ف الميدان و ف كل ساحه

علا صوته بالهتاف

م النهارده مش هخاف

مش هسيبهم يسرقوكي

يسجنوني ويسجنوكي

ومهما يحصل هبقى فاكر

عملوا إيه فينا العساكر

زي طير ببارود صادونا

وبفسادهم قيدونا

فوق شوارعك جرجرونا

و ف الزباله كومونا

داسوا على ورد الجناين

جرفوه جوا الزنازن

دنسوا الحلم النضيف

الربيع قلبوه خريف

وكل مخلِص ليك يا بلدي

قالوا بِالكِدب إنه خاين

ولجل ما نشوفش المخبي

داروا ع القمـر اللي باين

وكسروا ف عضامنا كسر

والقضية والجناية حُب مصر

 

بس مصر مهما صابها

مهما مين لخبط حسابها

مهما ظالم ظلمه نابها

قادرة تاني تعيد حسابها

واللي نفتكره بعيد

راح تطوله كل إيد

وتبقى مصر من جديد

ف الحكايه والنشيد

ف الطفولة والشقاوه

ف إبتِسامة الصبايا

ف الكتابه والقرايه

و آيه بنقولها تلاوه

كل جمعه وكل عصر

والقلوب بتقول آمين

إدخلوها آمنين

مصر خيرها مالوهش حصر

وضل شجرة يبقى فيها .. زي قصر

ونفسي أشوفها

نفسي أشوفها أحلى مصر

0
0
0
s2smodern