بحبك يا مصر - الأكثر قراءة

العسكر غير الجيش

الزيارات: 48
تعطيل النجومتعطيل النجومتعطيل النجومتعطيل النجومتعطيل النجوم
 

 

الملح ماهواش سنترفيش .. لكن أبيض زي السكر

والديك بجناح وبريش .. وإن حب يطير عمره ميقدر

دول كانوا بيتين تهويش .. عشان أكتب وأنا متنكر

تقريباُ حالة طيش .. جاتلي من غير ما أفكر

وبقيت سامع طراطيش .. كدا زي الدنيا أما تمطر

بصيت ع الشارع م الشيش .. علشان أطمن وأستفسر

فلمحت بعيني درويش .. عمالي يقول ويكرر

العسكر غير الجيش .. والجيش مش هو العسكر

 

الجيش بيصون العرض

ويحمي الأرض

الجيش بيخوّف أعداءنا

ويطمنّا إن يوم نتخض

الجيش ملك الشعب بحاله

من أول فرد لآخر فرد

الجيش كلنا نتمناله

يبقى تملي ف عزة ومجد

وقت الشدة إحنا رجاله

ونكون جنبه يد ف يد

 الجيش فيه دايماً واحد من وسطينا

من بين أصحابنا أو من بين أهالينا

غير بقى زملاء دراستنا

وإبن جارتنا

في الجيش هتلاقي تملي

واحد من أولاد حتتنا

الجيش بيأمن لينا حدودنا

ميفرطش ف ورث جدودنا

الجيش نطمن بوجوده

وهو بيطمن بوجودنا

الجيش ليه واجبه ودوره

وإحنا كمان لينا دورنا

يعني العادي إن أحنا مافيش

فرق ما بينا غير في المظهر

على حلوها والمرة نعيش

وسوا مع بعض هنقدر نكبر

بس العسكر غير الجيش

والجيش مش هو العسكر

 

   العسكر نوعهم حاجة تانية

فاكرين الدنيا ماهيش فانية

ناسيين يوم فيه أرواحهم

ربنا هياخدها ف ثانية

كل اللي هاممهم مصالحهم

وفاشلين ف سياسة وإدارة

والقرش بيدخل جيبهم

من ورا سمسرة وتجارة

العسكر لو دخلوا مدينة

يمنعوا فيها الكلام

كل ناسها تصير سجينة

ومجبرة تدي التمام

العسكر ناس مش شبهنا

دي الحقيقة متنكروش

يعني لا هُم تبعنا

ولا هُم من ضمن الجيوش

العسكر هُم تملي الطرف التالت

اللي بيقسمنا طرفين

واللي كشوف حساباتهم زادت

في بلاد برا بالملايين

هم الساكنين جوا قصور

سارقين تكاليفها من قوتنا

لا بيدفعوا مية ولا نور

وإحنا ندوخ على تُربة إن مُتنا

العسكر دول بقى بيخلوا جنود

يعملوا صلصة

وصاجات كحك

وطاسات وصواني طبيخ

وساعات حتى يبيعوا بطيخ

أو يزرعوا جمبري لا مؤاخذة

العسكر دول لو بنوا بفلوسنا

كوبري ولا طريق بحارات

يصدروا حُكم عليه لو دوسنا

بالأمر هندفع أتاوات

هم عيون بتنشن بس

ع السلطة وكل الثروات

وإنتخاباتهم طبل ورقص

ويبقى فسيخ ويقولوا شربات

دا شروط الإعلامي بتاعهم

اللي بيقراها البيانات

واحد شكله يبقى ف عينهم

حلو وجاذب للستات

العسكر هم بتوع البيزنس

وبتوع كل الصفقات

وبتوع حفلات ممكن تحجز

عن طريقهم رقاصات

و ييجي رمضان يبيعولنا ياميش

قال كدا يعني الحال متيسر

وإحنا زي عبيد بنعيش

لو مرة نطقنا بنتكدر

أصل العسكر غير الجيش

والجيش مش هو العسكر

0
0
0
s2smodern