بحبك يا مصر - الأكثر قراءة

العلاوة .. ياحلاااااوة

الزيارات: 112
تعطيل النجومتعطيل النجومتعطيل النجومتعطيل النجومتعطيل النجوم
 


عملولك البحر طحين .. و قالولك كله عال

وهُم نصابين .. وبتوع حركات عيال

اللي قالوه من يومين .. كان وهم و كان خيال

واللي إدوه باليمين .. تاني خدوه بالشمال

والمكتوب ف الجرانين .. هجايص ف الطراوة

قال ويقولك علاوة .. ياحلاوة ياحلاوة

أهي طلعت مش هتجيلك .. وطلع إنت اللي هتديهم

وأنت اللي هينشف ريقك .. علشان تِقسِّمها عليهم

يعني هتدفعها بإيدك .. وكمان بفوايد ليهم

بقى وارد ترهن بيتك .. علشان تقدر تراضيهم

ماهو كدا ياهتطلع عينك .. ويزيدوا ف القساوة

قال ويقولك علاوة .. ياحلاوة ياحلاوة

طبخة وعليك طبخوها .. وقبل مايعلنوا حسبوها

إمتى وإزاي يدوها .. وإزاي تاني هيخدوها

بضريبة عليك يضيفوها .. وتذكرة المترو يعلوها

وآدي الكهربا غلوها .. وفلوس الدعم لغوها

دا مافيش ولا حاجة سابوها .. حتى الكوبري بأتاوة

قال ويقولك علاوة .. ياحلاوة ياحلاوة

يعني آخر المتمة .. وخلاصة الموضوع

حياتك مش مهمة .. لو حتي تموت م الجوع

دا كفاية يعيشوا هم .. ويكون صوتهم مسموع

أما أنت إن قلت كلمة .. أو مرة سؤال مشروع

يرموك بألف تهمة .. من التهم النقاوة

قال ويقولك علاوة .. ياحلاوة ياحلاوة

حتى أنت إحسبها براحتك .. وآهي حاجة للإفادة

الفرق مابين علاوتك .. والمصاريف الزيادة

أنا ع الناتج أراهنك .. وأنا ف غاية الأكادة

آخر الحسبة هيطلعلك .. يدوب فردة بيادة

تمشي وراها على مهلك .. من غير عند وشقاوة

 قال ويقولك علاوة .. ياحلاوة ياحلاوة

0
0
0
s2smodern