بحبك يا مصر - الأكثر قراءة

حمرا

الزيارات: 193

تقييم المستخدم: 0 / 5

تعطيل النجومتعطيل النجومتعطيل النجومتعطيل النجومتعطيل النجوم
 

 

بتقول ليه لمُعارض برا

يرجع ويعارض من جوا

مش م الأولّى تقول لمؤيد

اللي في يونية معاك بيعيِّد

يرجع بقى ويسيب الهجرة

ويعيش حر ف بلده الحرة

قوله كفاية عليه كدا غربة

قوله بلدنا صبحت عجبّة

يعني أوصفله وقوله دي جنة

وأحلفله بأنه هيتهنى

قوله أنكوا عايشين ف أمان

وأن مافيش حد بيتهان

متقولوش أن أبن جارتكوا

مخطوف منها من شهرين

أو كليِّة حد ف معارفكوا

إتسرقت مع فص العين

وأنخع بقى وأحكي ف فناكيش

وأكدب هنا على راحتك .. عيش

وإياك تتكلم عن سينا

وعن تهجير ناسنا وأهالينا

وإوعى تجيبلوا سيرة الزحمة

ولا سعر البنزين واللحمة

ولا إن الكهربا غلوها

والمية لأثيوبيا أدوها

وخبي عليه أن الإعلام

بيوزع ع الناس أوهام

وإن الصحة والتعليم

ميزانيتهم بالملاليم

وإوعاك ترغي معاه في ديونّا

وإن مافيش سُياح بيجولنّا

وإن تيران هي وصنافير

إتباعوا خيانة وتزوير

وإن الدوري بدون جماهير

والشرطة محاصرة التحرير

وماتنساش موضوع الجون

وماتش الغاز مع بني صهيون

وإوعى تقوله إنك بتعافر

ونفسك تاخد فيزا تسافر

متقولوش ماهو زيك عارف

بس بيعمل قال مش شايف

زيك كدا بيأيد باطل

وبرضه معلق صورة القاتل

بس إن أنت تقوله تعالى

أرجع مصر يقولك لا لا

أنت فاكرني عبيط يامغفل

دي العيشة برا أجمل وأسهل

هنا مبشوفش الجيش في الشارع

ولا بتهزق نازل طالع

البني آدم هنا ليه قيمة

والإنسان هنا كلمة عظيمة

بتعالج ببلاش لما أعيّا

وحقوقي بخدها م الدولة

عايش حر بربي عيالي

و قد مبعرق بيكون مالي

هنا مافناش أسياد وعبيد

وأنا مطمن قوي وسعيد

تسأله راضي بقهرك ليه

وإزاي على ظلمك بيوافق

واللي عليك خايف يلاقيه

وعايزك حر .. معاه يتخانق

دقني آهي لو رد عليك

وأحلق شنبي إن قالك راجع

وعمره مايرضى يعيش زييك

يافقير قوي ف الوطن الضايع

بس آهو زيك كدا بيطبل

ويزور بالقصد حقايق

أنت يجوز ساذج أو أهبل

إنما هو خسيس ومنافق

زيك قال على يونية دي ثورة

وأن يناير تبقى مؤامرة

وأما تقوله يونية آهي نجحت

ليه مرجعتش مصر .. بيسكت

ويقول تحيا أكتر من مرة

إنما يرجع .. هأ أوأو .. حمرا

0
0
0
s2smodern