بحبك يا مصر - الأكثر قراءة

جوا قلبي

الزيارات: 956
تعطيل النجومتعطيل النجومتعطيل النجومتعطيل النجومتعطيل النجوم
 

لما هتعرف إيه جواه .. هتقول على قلبي يا محلاه

الغيط جنة راح تلقاه .. و الضلاية أجمل قصر

جوا قلبي فيه حياة .. جوا قلبي عايشة مصر

 

جوا قلبي و إنت داخل .. راح تلاقي ع اليمين

فيه محل بتاع فلافل .. جنب منه بتاع سمين

بعد منه فيه كبابجي .. فيه قصاده بتاع عصير

قبل منه قهوة بلدي .. عند ناصية سوق كبير

فيه حاجات مالهاش حصر

جوا قلبي فيه حياة .. جوا قلبي عايشة مصر

 

جوا قلبي الشمس طالعة .. و نورها بيدفي المكان

رحلة للطلاب ف جامعة .. رايحين فيها على أسوان

قلبي فيه الدنيا هيصة .. و جوا منه ناس كتير

ميكروباس بينادي جيزة .. و دا بعديه بيقول تحرير

و دا ع العتبة و باب النصر

جوا قلبي فيه حياة .. جوا قلبي عايشة مصر

 

جوا قلبي صلاة الجمعة .. و حديث الشيخ الشعراوي

سيدنا الحسين هتقيدله شمعة .. و هتتمشي وسط حواري

الناس فيها زي قرايب .. وبيسألوا دايما على بعض

و إن سافرت و كنت غايب .. يبقى شوقهم ليك بجد

و هيدعولك ضهر و عصر

جوا قلبي فيه حياة .. جوا قلبي عايشة مصر

 

جوا قلبي بتاع جرايد .. عنده فرشة فوق رصيف

ليه سنين ع الحال دا صامد .. يسعى علشان الرغيف

و اللي بيبيع البطاطا .. و اللي بيبيع المدمس

عيشة عايشينها ببساطة .. يوم ممرر يوم كويس

شهر حلو و شهر كسر

جوا قلبي فيه حياة .. جوا قلبي عايشة مصر

0
0
0
s2smodern