الجيش لو نزل الشارع .. إتكلم عن مصر يا سامع
تلاتين سنة و طالع .. أو رايح و لا راجع
أو و إنت جوا المقبرة
و لا صوت يعلو فوق صوت العسكرة
الجيش في كل حتة .. ع الكوبري و في الميدان
بقى زيه زي الشرطة .. بيقتل فينا الإنسان
و كل البلد متكدرّة
و لا صَوّت يعلو فوق صَوّت العسكرة
و الله ما حكم جيش .. و لا فيه مصلحة أو رغبة
و من همشي لأ ما أمشيش .. هحكم و أنا واقف ورا تَبّة
أو جوا مجنزرة
و لا صَوّت يعلو فوق صَوّت العسكرة
الحفر ع الناشف .. و كمان سنة هنعوم
خلص الرصيد ع التالف .. و غرقنا في البدروم
و رجعنا سنين ورا
و لا صَوّت يعلو فوق صَوّت العسكرة
مؤتمر إقتصادي ناجح .. و كل عام هنكرره
باظت كل المصالح .. و مافيش مستثمر عَبرُه
و أديكوا شفتوا اللي جرى
و لا صَوّت يعلو فوق صَوّت العسكرة
مليون وحدة سكنية .. و زيها فدادين زراعية
ما بناش و لا حتة أوضة ..أو رمم حيط في روضة
و لا صلّح غيط درة
و لا صَوّت يعلو فوق صَوّت العسكرة
اللي يقرب لمصر .. أقسّم بالله هيشيله
و إدىَ جزيرتين ف البحر .. بمزاجه لكفيله
و طلع الدكر مَرّا
و لا صَوّت يعلو فوق صَوّت العسكرة
من مصر قد الدنيا .. لمصر لسة وليدة
من بكرة هنبقى حاجة تانية .. لـِ بقينا ع الحديدة
فقر و شحاتة و مسخرة
و لا صَوّت يعلو فوق صَوّت العسكرة
من دا أنتوا نور عنينا .. و لا حد حن عليكوا
لـِ إنتوا مين؟ بقينا .. و منين عايزيني أديكوا
كدب و نفاق بالمسطرة
و لا صَوّت يعلو فوق صَوّت العسكرة
