طول عمري بليد ف الجغرافيا .. و لا مرة رسمت لوحدي خريطة

لا أنا عارف فينها حدود المية الدافية .. و لا عارف فين بتكون المية غويطة

ما أقدرش أقولك فينها خطوط الطول .. أو فين موجودة خطوط العرض

معرفش أفرق بين وديان و سهول .. و لا بين الجسر و بين السد

بس أعرف إن محدش غير الخاين .. هو اللي رخيص بيبيع الأرض

و محدش غير الندل بيتهاون .. في الحق عشان منحة أو قرض

و مع إني ما بفهمش ف تضاريس .. و لا بفهم لا ف أرصاد و لا طقس

و تملي أدور في القواميس .. عن معنى الأفقي و معنى الرأس

بس أما حدود وطني أقيس .. ألاقيه العرض كرامة و الطول عزيّة نفس

رملته و ترابه و كله عليا عزيز .. و لا أرضىَ بنقطة مية منُه تخس

إنما فيه ناس خبراء ( ..... ) .. و أخلاقهم من أخلاق ( ...... )

شايفينها بلدنا رايحة فطيس .. و لسة ما فهموش الدرس