بحبك يا مصر - الأكثر قراءة

إفلاس

الزيارات: 1105
تعطيل النجومتعطيل النجومتعطيل النجومتعطيل النجومتعطيل النجوم
 

قعدت أحسبها براحة .. و لما وصلت للناتج .. ما أستغربتش بصراحة

فقلت أحسبها أنا و إنتوا .. و أشوف ناتج حساباتكوا

و معلش بدون ترتيب .. هنحسب فيها بالتقريب

إكتب يا سيدي عندك .. و واحدة واحدة على مهلك

100 جنيه سهم التفريعه .. اللي قالوا عليها قناه

إضرب بقى القيمة .. في مجموع اللي إشتراه

بعد كدا إضرب اللي إشتراله سهم .. 3 مرات على قفاه

و إخصم من المجموع .. تكاليف إقامة المخلوع

زائد فلوسه اللي ف سويسرا

و الصرف على كام مشروع

مافيش لحد الآن .. فيه عنهم أي فكرة

و إخصم يا سيدي كمان .. علاوات القضاه .. و زيادة رواتب الجيش

و منحة الداخلية .. و شوية التحابيش .. و السرقة و التهبيش

إكتب كمان عندك .. حصيلة صندوق تحيا مصر

أنا بنفسي سمعت المذيع .. ساعة ما أعلن لنا .. فحوى الخبر الفظيع

قالك وصلنا فوق مليون .. لحد العصر

و إحسب لكام وصلوا على المغرب .. و كام وصلوا تاني يوم الفجر

إخصم بقى منهم

مصاريف الإنتخابات اللي بلجان فاضية

و حفلة التنصيب اللي عملها الداهية

و ضيف عليهم سبق العجل .. و ديون جه عليها الأجل

و إخصم كمان مرة .. علاوات القضاه .. و زيادة رواتب الجيش

و منحة الداخلية .. و شوية التحابيش .. و السرقة و التهبيش

إكتب بقى عندك .. عشان خاطري على مهلك

دخل المؤتمر الإقتصادي في شرم الشيخ

زائد المشاريع اللي طلعت كلها بطيخ

و ضيف عليهم رز الخليج .. اللي جالنا ف شكاير

و يساوي كام جاكت بوتين .. اللي بنجمة و زراير

إخصم بقى منهم

تكاليف المواكب .. و الموتوسيكلات و المراكب

و 100 ألف دولار للبنك الأفريقي

و ضيافة الوفد الصهيوني الأمريكي

و إخصم كمان نوبة .. علاوات القضاه .. و زيادة رواتب الجيش

و منحة الداخلية .. و شوية التحابيش .. و السرقة و التهبيش

إكتب بقى عندك .. و أبوس إيدك على مهلك

حصيلة أبار الغاز اللي إكتشفناها بعد طول البحث

زائد حصيلة العلاج بالكفتة و الشفا م الإيدز

و ضيف عليهم إيراد حفلات الفنانين .. اللي عملوها في حبها

في إسكندرية و ف أسوان و ف شرم و الساحل .. و بلاد كتيرة عدها

و ضيف عليهم الجنيه المكرمش .. إصطباحة كل يوم

ما هو مسيره ها يتحوش .. لحد ما يبقى قول ميت كوم

و زود عليهم فرق رفع الدعم عن المواطن الفقير

و إخصم بقى من المجموع

تمن بنزين الطيارات اللي كانت بترسم قلوب في التحرير

و ضرايب ساويرس اللي لغاها الوزير

و تعويضات سياح المكسيك .. و الطيارة الروسي .. و الشاب الطلياني

و إخصم يا سيدي أي حاجة تفتكرها تاني

و إخصم كمان مرة .. علاوات القضاه .. و زيادة رواتب الجيش

و منحة الداخلية .. و شوية التحابيش .. و السرقة و التهبيش

أكتب كمان عندك .. و لا أقولك كدا كفاية

هتضيع ليه في وقتك .. ما هي بانت الحكاية

أحسن تصلي ع النبي .. و إحسبها واحدة واحدة

متكونش عبيط و غبي .. أو تبقى نفسك جاحدة

هتجمع دول على دول .. و دوكهمه على دوكها

و تضرب فيها عرض و طول .. و تطرحها و تقسمها

هيطلعلك نهاية القول .. و تفهم إيه زوارقها

و مين مخلص و مين دلدول .. و مين قسِّمها و ناهبها

سيبك يا سيدي بقى .. من أم سنين الحضارة

إسأل ضميرك كدا .. هتلاقي ميت إمارة

أو حتى إسأل أي حد من طلبة تجارة

أو إسأل أي عيل بيفهم في الإدارة

أو حد ليه في الفهلوة و في الشطارة

أو روح لحد ليه .. خبرة في الأبحاث

أو واحد عادي خالص .. عايش ف وسط الناس

هتلاقي الرد واحد بالنسبة و بالتناسب و القياس

إحنا خلاص بقينا

على حافة الإفلاس

و أخصم بقى عندك .. علاوات القضاه .. و زيادة رواتب الجيش

و منحة الداخلية .. و شوية التحابيش .. و السرقة و التهبيش

0
0
0
s2smodern