بحبك يا مصر - الأكثر قراءة

إيه يعني

الزيارات: 1046
تعطيل النجومتعطيل النجومتعطيل النجومتعطيل النجومتعطيل النجوم
 

إيه يعني لما الشمس .. ما تجيش على رمسيس

أو حتى لما يخس .. دخل قناة السويس

إيه يعنى لما نحس .. إن إحنا شعب رخيص

أو لما يبقى النحس .. سببه واحد خسيس

ماشي الطريق بالعكس .. و عايش على (التهجيص)

و لا سمعناش حس .. لشوية البلاليص

إيه يعني لما الدولار .. يهتك عرض الجنيه

يغتصبه ف عز نهار .. و لا يستر حد عليه

إيه يعني نخسر النيل في القمار .. و نشرب مجاري من بعديه

و ناكل لحم الحمار .. و نعد فوايد فيه

و تبقى الطلبات بالحجز .. كأنه لحم معيز

و لا سمعناش حس .. لشوية البلاليص

إيه يعني يزيد الراتب .. للجيش و الشرطة و للقاضي

و بقيت الشعب عليه واجب .. يتبرع غصباً أو راضي

إيه يعني بيسحب بالسالب .. من جوا البنك الفاضي

و يروح يتفشخر بمواكب .. ف العالم كله بقت ماضي

بيداري بيها النقص .. و فشله ف دور الرئيس

و لا سمعناش حس .. لشوية البلاليص

إيه يعني مافيش مليون شقة .. و لا فيه فدادين زراعية

و كل المشاريع صبحت سابقة .. و من قبل ما تبدأ منهيّة

إيه يعني العيشة بقت خنقة .. مافهاش و لا نسمة حرية

و زنازين السجن بقت زنقة .. و رجعنا لزمن العبودية

فيه الحاكم و بس .. هو لوحده اللي عزيز

و لا سمعناش حس .. لشوية البلاليص

إيه يعني سياحة مافيش .. و لا بقى بيجيلنا أجانب

و الناس علشان العيش .. عايشة كأنها بتحارب

إيه يعني عايزنا نعيش .. مع بني صهيون زي حبايب

و سلاح و رصاص الجيش .. يقتل أهل و قرايب

و إتنين إخوات كانوا أمس .. فرقهم ذئب خبيث

و لا سمعناش حس .. لشوية البلاليص

إيه يعني يقول أتباع .. و يهينّا إهانة مخيفة

فيصقف ليه الأتباع .. و كأن اللقطة لطيفة

إيه يعني الوطن إن ضاع .. فوق سجاد التشريفة

و الشعب إن مات أو جاع .. يحلفله مافيش تعريفة

و لا فيه حباية رز .. و الغلة خلاص خلاويص

و لا سمعناش حس .. لشوية البلاليص

إيه يعني خسرنا الماتش .. و فريقنا ما خدش الكاس

أو ليه الكورة ما رضيتش .. بالفرحة يحس الناس

من مرة زماااان ما حصلش .. آخر مباراة ما كسبناش

و الكاميرون نفسه ما وصلش .. لنهائي معانا و فاز

إشمعنى النوبة دي هز .. شبكتنا و روحنا فطيس؟

و لا سمعناش حس .. لشوية البلاليص

0
0
0
s2smodern