طبقاً للمادة إياها .. من شرع الغاب
و بنص الفقرة اللي وراها .. في قانون الإنقلاب
قررت الهيئة الهزلية .. بلا أي دليل و لا داعي
تحكم على طير الحرية .. حكم بإعدام جماعي
المفتي أفتى .. و القضاه حافظين
التهمة ثابتة .. و الإتهام صامدين
رافضين يعيشوا ف قهر .. رافضين يكونوا عبيد
قالوا كلمة حق جهر .. و ياعيشة حرة يا موتة شهيد
يا ناصبين المحكمة .. أحكامكوا في أنهي دين؟
ده أنتوا غلبتوا مسيلمة .. و الكفرة و الشياطين
بيكوا مال ميزان العدل .. و رخيص بقى تمنه
و أما اللي يحكم ندل .. إيه ننتظر منه؟
يا مأيدين الظلم .. و عاجبكوا حكم العار
و سكتوا لما الدم .. سال من قلوب ثوار
الموت علينا حق .. و عليكوا إنتوا كمان
لكن هيفضل فرق .. مين عاش و مات إنسان
يا معلقين المشانق .. و مضفرين حبلها
فيه رب للخلايق .. منكم هياخد حقها
صبتوا العدالة بعمى .. و حصن الشموخ إتهد
و يا ويله من قاضي السما .. قاضي ظلم ع الأرض
