بحبك يا مصر - الأكثر قراءة

الدم واحد

الزيارات: 986
تعطيل النجومتعطيل النجومتعطيل النجومتعطيل النجومتعطيل النجوم
 

بكتب كلامي لناس عارفهم .. و هم برضوا يعرفوني

و يعرفوا أنا فين بميل

و لناس بعيني مش شايفهم .. و لا عمرهم ف يوم شافوني

بس بينا شعور جميل

بكتب لخويا الشقيق

و أكتب لخويا في الوطن

بكتب لصاحب مرة جمعنـَّا طريق

و مرة فرقنـَّا الزمن

بكتب لجاري و إبن خالتي و إبن عمي

و لبنت أخويا و إبن أختي

و أكتب لأمي و لأبويا .. و ليك ياجدي

و أكتب لنفسي .. و الكلام ليكي يا ستي

للشيخ سلامة و عم مينا

لإبن مطروح و إبن سينا

للقهوجي و البوهيجي و إبن الذوات

للأسطى صبحي المكوجي

و لجارنا فتحي الثورجي

للمهندس و المحامي

و من جوة قلبي يكون سلامي

لجندي واقف في ثبات

بكتب و عارف إن ده مش رأيي وحدي

مش وحدي خايف م اللي حاصل فيك يا بلدي

تايهة العواطف .. بين فكر جابني .. و فكر عمالي يودي

الدم غالي لو هينزل من أخويا اللي معايا

أو كان هينزل من أخويا اللي ضدي

الهم واحد و الحكاية

إن أرضك هي أرضي

خلافنا وارد بس لازم في النهاية

ألقى إيدك ماسكة يدي

منسيبش جاحد أو حد مش صافي النوايا

على حلم لسة ما أتحققش يقضي

منقولش تاهت تفاصيل الحكاية

مش باقي منها غير فصل التحدي

ده الدم واحد و العزا .. لو فيه ضحايا

راح يكون عندك و عندي

0
0
0
s2smodern