بحبك يا مصر - الأكثر قراءة

فلول

الزيارات: 1000
تعطيل النجومتعطيل النجومتعطيل النجومتعطيل النجومتعطيل النجوم
 

يافل من الفلول ... لساك فاهم غلط

هو أنت إيه مخبول .. و لا ف دماغك زلط

مره كمان هنقول ... جايز تفوق م العبط

اللي يشيل الغول ... مايجيبش بعده أبو شبت

و اللي خلع قفه ... عمره مايرضى بسبت

يافل ياخفه ... فيه فل قبلك عـَنـَّد

بفضيحه و بزفه ... من بعد عـِنـده إنطرد

تلاتين سنه ألفه ... و ف النهايه شحت

و إنت بقى أتفه ... و صفر وسط العدد

محتاج يدوب لفه ... علشان تغور للأبد

يا فل بإزازه ... يا خمورجي ياأبو سيجار

جه وقت لأجازه ... تقضيها ف أي بار

يا عرة الساسه ... ويا اللي ليك إختار

شوفولكوا نفاثه ... سواقها مش طيار

مابقتش ليكوا عازه ... زمن المكوه إنقرض

يافل سبنا و حل ... معقوله مافهمتش

إنك حقيقي تعل ... و كمان مابتحسش

و الله حاجه تشل ... جلدك خلاص كرمش

تشبه خيال الضل ... و لسه بتهوش

بصراحه إنت ممل ... خليت دماغنا إتخوت

يافل نوعه بقري ... يا مصاحِّب الجاموس

قطر لنفاق مجري ... و بتعبد الفلوس

كان رأيي من بدري ... إنك تيس م التيوس

جدي بقرون بري ... و حمار راكباه لصوص

يقولولوا حاااااه يجري ... و يس تلاقيه ربط

يافل بالجزمه ... هتمشي تاتا تاتا

ده حبيبك الصرمه ... بعد سنين الغتاته

مابقتش ليه كلمه ... و لا كلمتين تلاته

إتشال من القمه ... بقى زي خيال مآته

و إنت نهايتك ف الخدمه ... باتا وسط البلد

يافل أستاذ بط ... و خبره ف الجرجير

دكتور ف سعر اللفت ... و الفجل أبو راس كبير

لو كان في منك فرط ... أنا كنت جبت كتير

تسالي زي البخت .. و البمب و الزمامير

بس أما روحت سألت ... قالوا ده صنف إنقرض

يافل فلافيلو ... يا نمس يا ألعبان

خلاص يا فرافيرو ... مابقاش يفيد طيران

سرك نشف بيره ... و المستخبي بان

و مافيش طريق غيره ...إلا طريق اللومان

سيب الغطا زيره ... و أبو الفلول و الولد

0
0
0
s2smodern