بحبك يا مصر - الأكثر قراءة

صوتك خيانه

الزيارات: 863
تعطيل النجومتعطيل النجومتعطيل النجومتعطيل النجومتعطيل النجوم
 

 

ياللي بتطفي بصوتك نوري

و القلب بتملاه بالهَم

إنساه الحبر الفوسفوري

ما أنت إيديك متعاصه بدم

و بتثبت الإدانه

صوتك خيانه

زيك زي اللي إنت إخترته

إنت و هو أخويا قتلتوا

إنت و هو الحلم إغتالتوا

إنت شريك وياه ف الظلم

و بتشبه السجانه

صوتك خيانه

إنت و هو ف نفس الخانه

هو السجن إنت الزنزانه

إنت عيون جواسيس فتانه

إنت صديد جرح ما يتلم

متعود ع العفانه

صوتك خيانه

زي الحربايه بميت لون

ويّا الكفه الراجحه تكون

عبد أجير ف عبيد فرعون

لو تتحرر تبقى ف غم

و بتعشق الإهانه

صوتك خيانه

إنت اللي رقصت ف يوم موته

اللي بكلمة حق بصوته

طلع صوتك بعد سكوته

بعد ما كنت أخرس و أصم

و كرامتك مش متصانه

صوتك خيانه

إنت يا فرع الثوره المايل

شوف ف مرايتك إيه لو راجل

شايِف إيه غير صورة قاتل

ضيَّع حق الضنا و الأم

يوم تأييده لخلق مُدانه

صوتك خيانه

0
0
0
s2smodern