بحبك يا مصر - الأكثر قراءة

ثوره كليله و دمنه

الزيارات: 866
تعطيل النجومتعطيل النجومتعطيل النجومتعطيل النجومتعطيل النجوم
 

 

إتجمعوا البهايم

ف يوم مالهوش نهار

إتفقوا و قالوا لازم

ناخد فوراً قرار

لحسن حالتنا خطره

بنواجه إنهيار

و لو إستنينا بكره

جايز نولّع بنار

مين فيكوا عنده فكره

يقولها بإختصار

لا هتبقى ليلتنا غبره

و عيشتنا تكون مرار

دي العصافير اللي برا

مش طايقه الإنتظار

قال قايمه قال بثوره

و هدفها الإنتصار

مش خايفه ديابه آمره

بنهش لحوم الصغار

و لا نافعه معاها جزره

و لا راضيه بالخيار

و عشان طلباتها الطاهره

سريعة الإنتشار

صبحت خيبتنا ظاهره

و بان الإنكسار

و إن إحنا شله فاجره

لمتنا زريبة عار

قوم بطه ريشتها حمره

قالت مالناش خيار

مش هتفيدنا مبادره

و لا ينجدنا حوار

خلوا الإشاره خضرا

للتعلب المكار

اللي بعد المُذاكره

و مُتابعة الأخبار

قال رأيي نقول مغامره

ورا منها فيه أشرار

و نخلي كلابنا الضاله

تـنبح و يجيلها سُعار

و معاهم بقى بالمره

الديب و البومه و الفار

يغزلوا ف خيوط مؤامره

تبلبل الأفكار

فالعصافير ترجع طايره

كل شويه ف مسار

و بعد ما جمعتهم دايره

دوايرهُم يبقوا كتار

فتروح ثورتهم غايره

و إحنا لوحدنا نختار

كتاكيت تلهِيها الغله

عن ثروة العطار

و فراخ بتكاكي مجامله

و تقول إننا شطار

بس العصافير الثايره

العصافير الأحرار

هزوا الجناحات الحره

و ردوا بعزم و إصرار

زريبتكم صبحت بايره

و بستانّا إتملا أزهار

و زي ما شيلناها البقره

هنشيل برضه الحمار

0
0
0
s2smodern