اللي بينك و اللي بيني .. صدقيني إسمه حب
دا أنت روحي و نني عيني .. ياللي ساكنه كل قلب
يا حبيبتي إسمعيني .. حسي بيا و بحنيني
إفتحي دراعك خديني .. و بحنانك حسسيني
قول حاجه طمنيني .. قولي بعد العسر يسر
قولي فرجه قريب يا مصر
مصر و الله بحبك .. و إسألي نيلك و هرمك
إسألي الزحمه ف شوارعك .. و الجريده اللي ف مطابعك
إسألي الأمواج ف بحرك .. و الشماسي و رمل شطك
إسألي مكن المصانع .. و الغيطان و الليل و فجرك
إسألي كنيسة و جامع .. و إسألي الدوشه و همسك
كل حاجه راح تجاوبك .. إني متشوق لحضنك
نفسي أشعر إني إبنك .. و إن أنا بكره اللي جايلك
إن أنا ف الضلمه قمرك .. و إني دمعك و إبتسامتك
إن أنا الفارس ف حلمك .. اللي نفسه يبقى شايفك
بعد نصر رايحه نصر
لجل تبقي أحلى مصر
مصر من غير اللي خانك .. و اللي هُنتي عليه و هانِّك
مصـر من غير اللي باعك .. و اللي ضيِّع خير ولادك
و اللي هرَّب حر مالك .. و اللي ولع نار ف قيمتك
و اللي عرا لحم بنتك .. و اللي وسَّع للجمال
و اللي من قبل الأوان .. فاتنا لجل البرلمان
نفسي تبقي للي شالك .. جوا عينه و إدهالك
للي جاد بالروح عشانك .. و إرتوى بدمه ميدانك
مصر للي يهمه حالك .. و اللي بعد الغيبه جالك
جه يقولهالك صراحه .. ف الميدان و ف كل ساحه
علا صوته بالهتاف .. م النهارده مش هخاف
مش هسيبهم يسرقوكي .. يسجنوني و يسجنوكي
و مهما يحصل هبقى فاكر .. عملوا إيه فينا العساكر
زي طير ببارود صادونا .. و بفسادهم قيدونا
فوق شوارعك جرجرونا .. و ف الزباله كومونا
داسوا على ورد الجناين .. جرفوه جوا الزنازن
دنسوا الحلم النضيف .. الربيع قلبوه خريف
و كل مخلِص ليك يا بلدي .. قالوا بِالكِدب إنه خاين
و لجل ما نشوفش المخبي .. داروا ع القمـر اللي باين
و كسروا ف عضامنا كسر
لما قولنا تحيا مصر
تحيا مصر بإيد شبابها .. اللي م اللي سرقها جابها
و اللي من بعد اللي نابها .. راجعَه تاني تعيد حسابها
ناويه بالشعب العنيد .. حالفه من غير العبيد
تبقى تاني من جديد .. ف الحكايه و النشيد
ف الطفولة و الشقاوه .. ف إبتِسامة الصبايا
ف الكتابه و القرايه .. و آيه بنقولها تلاوه
كل جمعه و كل عصر .. و القلوب بتقول آمين
إدخلوها آمنين ..مصر خيرها مالوهش حصر
مصر هي أحلى مصر
