بحبك يا مصر - الأكثر قراءة

مافيش بنزين

الزيارات: 1008
تعطيل النجومتعطيل النجومتعطيل النجومتعطيل النجومتعطيل النجوم
 

ياعربيتي عليكي حزين

و قلبي للسقوط آيل

دي كانت عشره بينّا سنين

ما بنفكرش في فرامل

و روحنا شمال و جينا يمين

و ياما عملنا في عمايل

نشوف كوبري نروح طالعين

وننزل لو طريق نازل

يا عربيتي بدمع العين

خلاص بينّا الغرام زايل

خلاص كل اللي باقي يومين

و يبقى فراقنا شئ حاصل

و أرجع أمشي ع الرجلين

و أحايل فيكي يا مفاصل

و آهو المشوار أبو دقيقتين

قليله ف ساعه أكون واصل

هنعمل إيه؟ مافيش بنزين

ف حكم العسكر الفاشل

نصيبك تبقي م العاطلين

و أنا زيك أكون عاطل

و طول ما الظلمّه دول حاكمين

مافيش بينا لقا واصل

يا فايتاني عشان لترين

و رايحه لغيري بالباطِل

قُريب الشباب راجعين

و عاجل يعني أو آجل

هجيب عربيه ليها تنكين

و أروح م الجيزه للساحل

طريق الثوره فيه ماشيين

لغاية لما نتقابل

و يبقى فرحنا ف الميادين

مافيش زيه فرح كامل

و يصبح للمرور قوانين

ما حدش فيها يتجامل

عقيد الشرطه زي أمين

و زي البِيه أو العامل

و يبقوا الكل متساويين

قصاد قاضي بضمير عادل

و لو نِفسه أبو تمانين

يجيب تسعين يِكون طايل

ما يفضلش ف طابور ساعتين

عشان جالونين و يتحايل

و بعد يا عيني هد الحيل

يِقولولوا مافيش سايل

تعالى تاني بعد يومين

يجوز حظك يكون هايل

و تمشي حكومة العاجزين

و تيجِي حكومَه فيها راجل

و مجلس عسكر الفاسدين

على ثكناته بقى راحل

و يحكم مصر مدنيين

عشان يتعدل المايل

و ترجع حلوة الحلوين

بلدنا للي يستاهل

0
0
0
s2smodern