بحبك يا مصر - الأكثر قراءة

بدلة حماده

الزيارات: 768
تعطيل النجومتعطيل النجومتعطيل النجومتعطيل النجومتعطيل النجوم
 

إكتب إسمك على الساعه و الولاعه

و علق الحلم اللي بالي بالك على الشماعه

تعالى نقيلك جوزين طراطير

و إن كنت مش داقق أدقلك عصافير

و فيه عندنا بلالين .. و دوا تليين

و كريم لبشرة النساوين

و حبوب ترجعك شباب

لو كنت م العواجيز

و عقد فل للأحباب

و شمعتين يوم الخميس

و سجادة للدعَى و الشكوى

و بدلة حماده

بدلة حماده غسيل و مكوا

إصحوا يا ساده ماهي بانت الخطه

أتاريها ريما لعادتها راجعه

و بعد السعاده من تاني فجأه

بقِّت البياده هي اللي حاكمه

و بتدينا الأوامر

و بدلة حماده

بدلة حماده بزرايِر

دهبي هيئة دواير

و دوس الزراير فن

و اللي يدوس ساحر

و الرك مش ع السن

الرك ع الضافِر

زرار عشان الأمن

حافظينوا العساكر

و زرار يقولك عن

إسم و سن المتظاهر

و أخطر زرار أنئن أن

هو زرار الأساور

زرار حقيقي جن

يخرس كل الحناجر

بعده الجعيص هيكن

و يقول خلاص حاضر

البدله قالت كن

ما أقدرش أتاخر

إنت فاكرني مَن؟

دا أنا ... فِل ... ع الآخر

م الغالبيه الصامته

و بدلة حماده

بدلة حماده فلته

مش محتاجه كرافته

بدلة حماده مافيش

تفصيله ليها ثابته

بدلة حماده بريش

مافهاش أي غلطَه

منسوجه بخيط تطنيش

مع خيط تسويف و أونطه

بدله ماركة شاويش

بتليق على مخله و شنطه

لو ناوي ما تفهمنيش

أحسنلك نام و إتغطى

و لا تتعب ف التفتيش

عن معنى مشاعري الصادقه

إعتبروا كلام دراويش

و حروف من غير و لا نُقطه

و إن روحت ياريت ما تجيش

لحسن هتجِيبلي النُقطه

أصل أنا بصراحه ماليش

ف حكاية حطه يا بطه

ما بخافش من التهويش

إكمني ماليش و لا سابقه

و خدمت زمان ف الجيش

و طلعت معلق شرطه

و شهاده تقول خدم

و بدلة حماده

بدلة حماده يا محترم

ما تقولش لأ قول نعم

ما تقولش هبقى

إفضل خدم

إرضى بمشقه

بوس القدم

مابقتش فارقه

إنت وجودك كالعدم

و بدلة حماده

بدلة حماده بكم

طويــــــــــل

و بنص كم

بدلة حماده تلم

و تشيـــــــل

كل اللي يفتح فم

بدلة حماده مستحيل

يبان عليها الدم

بدلة حماده تيل

زي الجراح و الهم

بتعيش زمان و سنين

لا بِتكرمش و لا تترم

و مادام مخك طخين

إستحمل بقى و إتخم

إنسي الحلم الجميل

و آهي دقني آهي لو تم

و الصبح هيرجع ليل

و الفرح هيقلب غم

و الماضي يعود على سهوه

بدلة حماده غسيل و مكوا

إصحوا يا ساده ماهي بانت الخطه

أتاريها ريما لعادتها راجعه

و بعد السعاده من تاني فجأه

بقِّت البياده هي اللي حاكمه

و بتدينا الأوامر

شاهد تسجيل حي للقصيدة

0
0
0
s2smodern