بحبك يا مصر - الأكثر قراءة

الوطن مش للجميع

الزيارات: 1057
تعطيل النجومتعطيل النجومتعطيل النجومتعطيل النجومتعطيل النجوم
 

الدين لله

و الوطن مش للجميع

الوطن بقى للـرئيس .. و رجال الأعمال

لظباط البوليس .. و صحاب الأموال

لبتوع الكوره .. و الفنانين

و الباقي ف الصوره .. غلابه و مطحونين

و حقهم بيضيع

الدين لله

و الوطن مش للجميع

عمرك سمعت مره .. أو قريت لو حتى سطر

عن حد م الناس المهمه .. إبنه مات ف حادثة قطر

أو إنه إتخنق ف الدويقه .. تحت التراب و الصخر

و لا حتى إبن بنت خاله .. غرق ف وسط البحر

أو حد م المباحث جاله .. ف بيته وقت الفجر

و قطعوه تقطيع

الدين لله

و الوطن مش للجميع

طب كام مره شوفت وزير .. واقف جنبك ف الطوابير

أو طلعت عينه ف مشاوير .. علشان رخصه أو تقارير

أو قطعوه النور لسعادته .. علشان ما دفعهاش فاتورته

و لا في حد من البهوات .. إتبهدل ف الميكروبسات

أو واحد مسؤول يوم مات .. و الجته بسبب الحسابات

ف المشرحه حجزوها أسابيع

الدين لله

و الوطن مش للجميع

يعني الوطـن ما بقاش وطن

إلا جوا البطاقه و نشيد الصباح

كلمه ف تحية العلم

و ذكرى ف الزمن اللي راح

و جملَه ف التشريع

الدين لله

و الوطن مش للجميع

0
0
0
s2smodern