خليك كدا مغلوب على أمرك
ضحي براحتك
بيعه سريرك
بيع مرتبتك
إنسى الجزء الفاضل من أحاسيسك
متفكرش تعيش على كيفك
قدم كل فروض الطاعه
إوعى تبص ف يوم ع الساعه
أصل الوقت دهو مش وقتك
و لا دي بلدك
متر الأرض باعوه ببلاش
و إنت نصيبك راح ما بقاش
إلا يدوب متر و كام سنتي
ما يكفوش لو كانوا قماش
ف ليل البرد تنام متغطي
بس إطمن
مستقبل إبنك هيجنن
و أكيد و ضروري هيدعيلك
ما أنت عشانه طلعت عينك
كام سنه و إنت الفقر شريكك
دا أنت كمان فرطت ف دينك
شوفت فساد و دفعت رشاوي
ضحكوا عليك بكلام و حكاوي
عملولَك م البحـر طحينه
حتى قالولك رجعت سينا
و إنت عشان طيب صدقت
مع إنك و لا مره قدرت
تقضي يومين فيها مع حرمك
دا أنت يدوب بتدبَّر أكلك
و كتير ياما بتسأل نفسك
إمتى اللحمه هتدخل بيتك
و ليه الزحمه ماليه طريقك
و المصلحه ينشف فيها ريقَك
و لا تمشيش من غير الواسطه
شوف كام سنه خطه ورا خطه
خَمسيَّه من ورا خَمسيَّه
و تسمع عن مشاريع وهمية
و الفايده تعود على الحراميه
الساكنين ف قصور خياليه
مركون فيها ميت عربيه
اللي براءه ف أي قضيه
و اللي عشانهم عملوا مارينا
و مدينتي بأسعار خرافيه
مصر خلاص مش ليك و لا ليّا
مصر خلاص مابقتش بهيه
مصر خلاص مش زي زمان
أجمل كل بلاد الدنيا
بقى قلبها مليان أحزان
و يصعب حالها عليك و عليا
خليك كدا مكسور غلبان
و أشكر ف الجيش و الداخلية
مع إنك منهم متهان
و معتبرينك لقمة طرية
