مَجلسهم مُنحّل .. و لو بالزور ربطوه
دا نظام زي الخل .. إزاي هيحَلوه
عقدة و مالهاش حل .. الواد ويا أبوه
خلوه مجلس أهل .. لما سوا دخلوه
و أول ألفٌ باء .. بعليه الطلاق
عبر عن أخلاق .. كل اللي إنتدبوه
و الحاجة اللي تعل .. أيُها حد جابوه
م الناس اللي تشل .. عن تزوير سألوه
إلا يقول ده غل .. فينوا دليلكوا هاتوه
دا المجلس كدا فل .. و كفاية جهلّة مَلوه
من عشاق الذل .. و عبيد المعتوه
اللي عقولهم سهل .. بكلام كدب تتوه
و لو جبنالهم بغل .. صوتهم راح يدوه
حتى إن كان أبو جهل .. برضوا هينتخبوه
ماهو مجلس فهلوة .. قايم ع الفتونة
و بأصوات م الهوا .. كوسة يا خلق ياهوه
و كمان مبيجلسش .. إلا إن كان بالغش
و تحت القبة يخش .. ينسى اللي جابوه
مجلس بالتزوير .. و بأعضاء طراطير
و لولاها التقارير .. ما كانوشي دخلوه
مجلس إيه بلا نايبة .. دا النايب و النايبة
مالهمش و لا فايدة .. و دور كومبارس خدوه
مجلس حاطط شرط .. ميخشوش غير عُبط
دا كأنه باكبورت .. كان مقفول فتحوه
