بحبك يا مصر - الأكثر قراءة

البنـي آدم مات

الزيارات: 1074
تعطيل النجومتعطيل النجومتعطيل النجومتعطيل النجومتعطيل النجوم
 

 

حظك حلو

قبضوا عليك قُدام عمارتكوا

و إتشهرِت طبعاً حتتكوا

أنـا مسكوني ف لجنه جنب لاظوغلي

إنت قالولك .. إنت يا أخ

و أنا ندهولي

رايح كدا على فين يا روح أُمك

و إن فار دمك غصبن عنك

أو رديت قلت الله يسامحك

تبقى دخلت البوكس برجلك

و إتخيل ويايا براحتك

أخلاقي ما تسمحش أقولك

إنت و بختك

لو صدقوا إن إنت ف بلدك

يبقى مقامك كام شلوط

ويا جوزين إقلام على خدك

و آهي أرحم من علقة موت

لو مكتوب غلبان ف بطاقتك

و عنيك ما تشوف إلا النور

واحد ورا واحد بالدور

دا مافيش أرخص م الإنسان

و لا فيها حاجه إن مات مقهور

و نفعت جنب الحِيطه زمان

دلوقتي يا تحتها يا تغور

أو تبنيلك تربه عموله

و تزود مقادير المونه

تدفن فيها أمال مقتوله

جنب الأحلام المدفونه

و لا تعيش بدماغ مشلوله

زي حمار على ضهره حموله

تفهم بس الشي و اليس

و لا ليك حق بحاجه تحس

إفتح كدا شباكك بص

شايف إيه غير يأس و عجز؟

عاجزين نفرح مره بجد

عـَاجـزيـن يـِوصـَّل صـُوتـنـَا لـحـَّد

عاجزين حتى نخاف على بعض

إقفِل تاني خلاص شباكك

و إتخيل إيه باقي ف بالك

عارف إيه هتلاقي جوابك؟

باقيين بس تلت هرمات

و فين ما تبص تلاقي مولات

و قهاوي و زحمة إشارات

لكِن صعب تشوف بني آدم

البني آدم ماضي و فات

البني آدم بح

البني آدم مااااااااااات

شاهد تسجيل حي للقصيدة

0
0
0
s2smodern