مد إيديك برجوك .. خد بالحضن أخوك
واحد بلده و بلدك .. واحد نهر النيل
و حق لولده و ولدك .. عيشة ف بكرة جميل
مافهوش أي مرار .. و لا قسوة و لا شوك
واحد ربه و ربك .. واحد نبي و رسول
و كبير ذنبه و ذنبك .. قاتل أو مقتول
الإتنين ف النار .. من غير أي شكوك
نفس مصيره مصيرك .. نفس عدوه عدوك
هيصيبه اللي يصيبك .. و يضيع حقه و حقك
فتش جوا ضميرك .. إسمع تاني بقلبك
مين كان واقف جنبك .. مين كان ف الميدان
دراعاته بيحموك
لو جه أخوك و نادالك .. واجب ترجع ليه
تاخده ما بين أحضانك .. تمسك تاني إيديه
و يروق باله و بالك .. لو جنبك تلاقيه
بيشاركك أفراحك .. زي ما كنتوا زمان
و بينكوا مافيشِ فروق
مدوا إيديكوا لبعض .. دا أنـتوا طريقكم واحد
و لا تمشوش ورا حد .. غرضه ما بينكوا يباعد
و قولوا لشهدا المجد .. ع الإخلاص هنعاهد
بس قولولها بجد .. إن إنتم أخوان
و ليكوا على بعض حقوق
