ما دامتش مره لغيرك .. فأزاي بقى تدوملك
نافشلنا ف ريشك .. و فاكرها بيت ملكك
و لما زاد طيشك .. شغلتنا عندك
و أمرت دراويشك .. يسبحوا بفضلك
و إتلموا ألاضيشك .. يدلعوا ف إبنك
و عايزها في وصيتك .. صورته مكان صورتك
طب دا أحنا ف سنينك .. جوعنا على يدك
و بقينا ندعيلك .. روح ربنا يخدك
حسبتها بكيفك .. و طبختها لوحدك
فاكرنا هنسِيبك .. تديها لُه براحتك
يخرب مطان عيشك .. حالنا ماهوش همك
نافشلنا ف ريشك .. و فاكرها بيت ملكك
عيد تاني ف الحسبه .. أو شوفلنا محاسب
يِكتبلنا نسبه .. لو حتى بالسالب
دي دولة مش عزبه .. و مولد مالوش صاحب
و لا أحنا فيها غُربّا .. مالناش و لا نايب
جواها و ف غربه .. و العدل بقى غايب
فياريت تفوق حبه .. دا أنت بقيت شايب
يا تجيك بقى كُبه .. يا مُصيبه م المصايب
تخدك مع الصُحبه .. إنت و كل القرايب
