بحبك يا مصر - الأكثر قراءة

خليه صباعك ع الوطن

الزيارات: 1246
تعطيل النجومتعطيل النجومتعطيل النجومتعطيل النجومتعطيل النجوم
 

خليه صباعك عل الوطن

تسمح تشاور ع الطريق

اللي آخره نلاقي بكره

أرجوك تحاول يا صديق

جايز نوصل لفكره

كل اللي عايزه من وقتك دقيقه

تفتحها ويايا الخريطه

حطه صباعك عل الوطن

بص بعينيّا

أو بص يا صديقي بعينيك

جاوب عليّا

و إسألني و أنا أجاوب عليك

شايف وطنّا ع الخريطه قد إيه؟

طب قولي ليه بِنتوه و ليه

جواه تملي بِنتسِجِن

و إزاي يا صاحبي بتضل الخطاوي

و إزاي بنبقى سطر واحد ف الحكاوي

ليه ليلنا دايماً عتمه داكن

و إزاي ف لحظه بِتضيع الأماكن

ليه كل حلم يا صديقي

ينتهي دايماً ب لكن؟

لساه صباعك ع الوطن؟

حاسس بإيه؟

مش زيي نفسك تبقى فيه؟

مش زي ما أنت تخاف عليه

تتمنى إنه يخاف عليك

مش كل أملك تلقاها إيديه

ممدوده بالحب لإيديك

مش برضه نفسك يوم تحس بإنسانيه

و إن إنت واحد م البشر

مش بس يبقى ف الهويّه

أو كلمه تِقراها ف خبر

لساه صباعك ع الوطن؟

خليه هناك

و إن كنت حاسس بالشجن

قلبي معاك

زيك يا صاحبي بينتفض

قلبي الحزين

أنا و إنت عنه بنبتعد متغربين

مش شايفة عينّا غير عينين

بالدمع دايماً مليانين

مش لاقية إيدنّا غير إيدين

بالغصب صبحوا قصيرين

طب قولي مين

يقدر يرجع اللي ضاع وسط السنين

أو مين يطلع اللي باع و يعرف الشاريين

مين اللي طول اليوم يعافر

مين اللي غصبن عنه سافر

ما تقول يا صاحبي إن كنت قادر

ما تقولش ناسي و إنت فاكر

عايزك تقولي مين ف ناسي

لساه يا صاحبي ليه تمن

عارفُه سؤالي صعب قاسي

شايف شفايفك محتارين

و أنا برضه زيك جوا راسي

مش لاقي غيرهم كلمتين

أرجوك ما تفقدش الأمل

خليه صباعك ع الوطن

0
0
0
s2smodern