بحبك يا مصر - الأكثر قراءة

أنسى إزاي النمسا؟

الزيارات: 1055
تعطيل النجومتعطيل النجومتعطيل النجومتعطيل النجومتعطيل النجوم
 

 

تبقى الحاجه بنص جنيه .. و يقولي البياع دي بخمسه

و أركب تاكس يقولي يا بيه .. العداد دا ديكور لا مؤاخذه

و دا لابس ساعه ف إيديه .. و ملخبطه مواعيده و بايظه

فات أسبوع و أنا مستنيه .. و لآخر الشهر ما جاش لسه

فأنا من قلقي و خوفي عليه .. روحت أطمن يمكن حادثه

و أما سألته المانِع إيه .. بقى يحكيلي عشرين قصه

بس جوابه كان ف عينيه

إنسى نظام و نضافة النمسا

إنسى إزاي ف شوارع زحمه .. و الدبان ع العيش و اللحمه

و بنات لابسة ملابس فخمة .. تشرب شيشة و تطلب فحمة

و الست الرقاصة العالمة .. سموها المحترمة النجمة

الفاشلين بقى ليهم لازمة .. و أهانوا العالم و العالمة

و أي حقير بقى ليه في اللمة .. من غير حاجة شنة و رنة

فيه أكتر من كدا إيه أزمة .. كنا ف نور و بقينا ف ضلمة

شيخ يفتيلنا يقول الجنة .. ما يشوفهاش غرقان من جيلنا

كان هربان من فقر ذاللنا .. و نفسه يودع قهر كاسرنا

هاجر ليه مش كان يستنى .. يسمع سب العيشة و دينّا

و الشيخ التاني جننا .. قالنّا نرضع مهما كبرنا

حتى الصحفي جزاه ف زمانّا .. سجن و الجلد الشيخ أفتالنا

و لا شيخ واحد جه أنصفنا .. مرة بقتوى تراعي ظروفنا

فتوى تحرم موت من خوفنا .. أو لو نسكت مهمن شوفنا

دا أحنا كلامنا نصه قرفنا .. و النص إتبهدلنا و ضعنا

جوا القسم بتطلع عينّا .. و بيهتكوا حُرمة مواضيعنا

و يقولك دا بلدنا بتاعنا .. و إحنا بنفهم غلط المعنى

و إن يوم قلنا إزاي و إشمعنى .. مش مبسوط غير حزب شبعنا

تلقى الرد عشان لو جعنا .. مش هنفكر غير ف بطونا

و يكون سهل يبيعوا وطنا .. لحساب الشركات الخاصة

كدا من غير تصريح و لا رخصة

يبقى إزاي أنساها النمسا؟

أنسى إزاي و أنا عشت زمان .. حاسس فيها إن أنا إنسان

عمر ما ظابط ليّا أهان .. و لا ضاع حقي عشان غلبان

و لا فيه قاضي بظلم أدان .. أو ميِّل للعدل ميزان

و لا يوم قطعوا لصحفي لسان .. و لا قفلولنا طريق و ميدان

و لا كام فنانة و فنان .. أساميهم مالية الجرنان

فيهم الواحد بيته فدان .. و إحنا بيوتنا ناقصة حيطان

و اللي يجيب للعقل جنان .. تكريمهم أشكال و ألوان

دا خد جايزة كبيرة عشان .. مثِّل دور مايص بلبان

و دي عملت دورها بإتقان .. شاذة و بتحب النسوان

و دا بيغني نفاق لفلان .. من غير كلمة و لا ألحان

و سابوا شبابنا يعيش عطلان .. و يقضي اليوم كله ف توهان

يشرب بانجو حشيش قطران .. و ينام قبل النور ما يبان

كان زي الورد الفتان .. قطفوه ظَلمَّة قبل أوان

حاجة تجيب خنقة و طهقان .. و تخليك عايش زهقان

و أنا مكدبش عليكوا زعلان .. على أم الدنيا و حيران

إزاي مصر أسيبها الآن .. و أنا قلبي بحبها مليان؟

ما هي دي بلدي و مهمن كان .. ليّا صحاب فيها و جيران

فيها أهلي و كل الخلان .. و أجمل ذكرى و أغلى مكان

و لا فيه يوم ما أسمعش أدان .. ف معاد الصلوات الخمسة

إنما برضه و رب العزة

عمري ف يوم ما أنساها النمسا

0
0
0
s2smodern