بحبك يا مصر - الأكثر قراءة

الأجازه خلصت

الزيارات: 1147
تعطيل النجومتعطيل النجومتعطيل النجومتعطيل النجومتعطيل النجوم
 

 

ياللي راجع م الأجازه

و المشاعر سخنه طازه

قولي لو فيها غلاسه

جى مبسوط و لا ماذا؟

ما أنت ما سمعتش كلامي

ليه ما خدتش بس لنضه؟

كنت عامل فيها حامي

لأ و قادر ع المناهده

للأسف بعد إحترامي

النتِيجه برضه واحده

كله سمعك قلت يا أمَّه

لما كنت ف حته ضلمه

لما فجأه صرت وحدك

و الصحاب ما بقوش جنبك

و رغم إني كتير نصحتك

إنت كنت تزيد في عندك

قولي فين راحت لماضتك؟

جاي راجع باينه خيبتك

شُفت آخرتها بجاحتك؟

كنت تايه جوا بلدك

آه يا عبطك

كنت فاكر حد فاكرك

و إكتشفت لولا قرشك

كانوا حتى نسيوا إسمك

بالحقيقه سبني أكاشفك

ما أنت عارف إني كاشفك

جاي طبعاً مالي كرشك

يا فلاحتك

طب ما كان الأكل عندك

كنت بِتجِيبُه بكرامتك

عُمر حد ف سوق ما غشك

و لا واحد ماشي زقك

و لا ظابِط سب أهلك

و لا قطعلك بطاقتك

يا هبالتك

كنت متعشم في صاحبك

إنه يِيجِي ف يوم يساعدك

ع اللي متغيَّر يدلَّك

مرتين و تلاته واعدك

هتلاقِيني بكره جايلك

يا صديقي تحت أمرك

و النهايه تفوت أجازتك

ع المطار تطلَّع بِشنطك

و هو صُدفه هناك يقابلك

تبقى ماشي تداري دمعك

تبقى متشوق لبُعدك

فجأه تلقى الغربه سعدك

أيوه حاسس بيك و فاهمك

أيوه لامس قلبي ألمك

بس جاوب لو سألتك

لما ييجي أمر ربك

فين توصي يبقى دفنك؟

رد يالا بعد إذنك

و لا أقولك على راحتك

أصل عارف إن ردك

زي ردي أكيد و أراهنك

حاجه مش عايزه كياسه

و لا رأيك إيه يا هذا؟

بس إوعى تقول سياسه

أو تجيب سيرة الرياسه

ياللي راجِع م الأجازه

و المشاعر سخنه طازه

قولي لو فيها غلاسه

جى مبسوط و لا ماذا؟

0
0
0
s2smodern