بحبك يا مصر - الأكثر قراءة

الفيل ف المنديل

الزيارات: 876
تعطيل النجومتعطيل النجومتعطيل النجومتعطيل النجومتعطيل النجوم
 

الفيل ف المنديل .. والفار ف النمليه

إتفقوا و حاسبين .. حسابات العمليه

و عشان الحاسدين .. و الناس النكديه

قالوا نقول بعدين .. دي ما كانتش النِيه

و لا كُناش قاصدين .. بس لاقينا لقيه

ميغه و ناس ساكتين .. فقلبناها تكيه

غير إننا شايفين .. دي مواضيع سيادية

و إنتوا عبيد حقودين .. و العبد ما لوش ديّه

خليكم عاقلين .. إنسوا أوهامكم ديَّه

فوق يا أبو مخ طخين .. إوعى تقول حريه

دا يدوب غمضة عين .. و تودعها الدنيا

خليك م الفاهمين .. إنسى الكلمه دهيَّه

دا أنتوا كفايه عايشين .. و آهي أيام مقضيه

سيبكم م الطايشين .. لحسن فيها قضيه

و إنتم متراقبين .. بالخطوة و بالثانيه

حتى كمان عارفين .. ملابسكوا الداخليه

الفيل ف المنديل .. والفار ف النمليه

الفيل ف المنديل .. و الهوا جوا إزازه

لو عايز نفسين .. أبعتلك بزازه

من عيني الإتنين .. شاور بس يا هذا

لكن فيه شرطين .. يعني شويه غلاسه

ما تقوليش منين .. و لا تسألني لماذا

و إوعى تقول على فين .. و لا لمين متباصه

لنروح ف الرجلين .. هوا و بأمر رياسه

ما خلاص القوانين .. على قدنا مِتقاسه

و قضاه أو محامين .. ما بقاش ليهم عازه

عقبال السامعين .. خدوا تصريح بأجازه

و اللوا أصله أمين .. و العسكري بقى باشا

و شمال و لا يمين .. حتى ف بيتكُوا حراسه

و بطاقة التموين .. إتقلبت كراسه

فيها كل يومين .. تكتب وصف خلاصه

عنك و إوعى تعين .. أي حاجات حساسه

و تصورُه صورتين .. يبقوا على الفرازه

علشان دول رايحين .. للحاكمين و الساسه

الفيل ف المنديل .. و الهوا جوا إزازه

الفيل ف المنديل .. و العصفور ف العش

و بلاش التفاصيل .. لحسن أقولها ماعش

دا بتوع التحاليل .. قالوا ما تتحللش

حاولوا كتير و قليل .. الناتج ما طلعش

و لا لقيوش دليل .. حاجه ما تتفسرش

ليه بقى ليلنا طويل .. قمره ما بينورش؟

و ليه الحمل تقيل .. بيزيد ما بينقصش؟

ليه بنشوف الويل .. و دموعنا ما تنشفش؟

حاجه تهد الحيل .. و تخليك ما تشوفش

كل يومين تعديل .. برضه متتعدِّلش

وصلتلك يا جميل .. أو لسه ما وصلتش؟

طيب قرَّب مِيل .. جايز ما بتسمعش

لو عندك تعليل .. قوله و ما تطنش

و إوعى تقول مواويل .. و تعشمني بغش

يعني بلاش تضليل .. و ما تخافش و لا تكش

جاوب بقى يازميل .. بس ياريت ما تغبش

إزاي بلد النيل .. حالها ما يتنيلش؟

شاهد تسجيل حي للقصيدة

0
0
0
s2smodern