بحبك يا مصر - الأكثر قراءة

إن الله لا يغير ما بقوم

الزيارات: 1056

تقييم المستخدم: 0 / 5

تعطيل النجومتعطيل النجومتعطيل النجومتعطيل النجومتعطيل النجوم
 

عيني زمان في السيما شافتها
قلت دي جنه و إتمنيتها
و أما سافرت أوروبا و جيتها
إستغربت كتير لحالتها
صح نضيفه شوارعهم
حاجه زي الفل
بس الناس مشاعرهم
بارده لدرجه تعِل
و بعد ماعشت ما بينهم
بانلي خلاص السر
طلعت جامده قلوبهم
من قلة أيام الحر
و اللي يعوم ف بحورهم
ما بيرساش على بر
يوم ورا يوم و سنين بتمر
و إحنا حالتنا يا ناس ما تسُر
و اللي رمانّا صحيح ع المُر
إن الحال في بلادنا أَمر
مالي قلوبنا آهات
ف الإشارات
واقف صاحبي يبيع جرنان
و مجلات من النوع إياه
حتى الخمر يا ناس بيعناه
ع العمارات
شقه بشقه يدق بيبان
و يهين نفسه عشان إعلان
و اللي يفكر يِرجع بلده
يلقَى الوضع هناك تعبان
نص الناس في بلادنا لصوص
ناس تعبانه و ناس مخصوص
اللي معهِشِ فلوس بيلوص
و اللي معاه ف العين محروس
و الغلبان في الفقر يغوص
يرجع تاني يمد إيديه
ماسك شوك بيجرَّح فيه
ورد يا هانم ورد يا بيه
إبن بلدنا يا عيني عليه
ياما الدمع بيملى عينيه
و أما الشوق ليها يناديه
يلقى عذابه جوا مطارها
واقف ظابط مستنيه
مش علشان بيرحب بيه
لأ دا ناويله و يسأل فيه
إسمك
سنك
جاي منين ؟
إيه كان جايبك ؟
راجع ليه؟
إفتح شنطك
شايل إيه ؟
هات باسبورك
أبص عليه
و بعـد يَدوب كام ساعه يجِيه
و إتنين عسكر من حواليه
و يقوله ببرود قال إيه
كان فيه تشابه بين إسمين

أحمد طه و جورج فطين
مش عاجبه يبقى المسكين
المطلوب و عليه العين
يرجع تاني الغربه حزين
يلقى الأهل جواب باعتين
يا إبني إلحقنا مش لاقيين
شاله الدعـم عن التموين
إبعت لينا قوام قرشين
لحسن يا أبني نموت جعانين
يعمل إيه و يجيب من فين
أهله يا عيني مش عارفين
يبدأ ينصب ع التأمين
و لا يتاجر ف الكوكايين
و عشان أهله مش عايشين
يبقى صاحبنا م الضالين
و اللي يبل زياده الطين
إننا دايماً مختلفين
ناس بتاجر بــسم الدين
و اللي يساري و اللي يمين
و دا بينادي يعيش الوفد
و لا يعرفشِ فيه و لا حد
و الأستاذ دا ف حزب كبير
عمالي ينادي بتغيير
قال عايز ف أوروبا خلافه
مش بالذمه يا ناس دي هيافه؟
إزاي هنغير حوالينا
و إحنا ما غيرناش حاجه فينا؟
و إزاي ربنا يرضى علينا
و إحنا بنكره كدا بعضينا؟
لو مش فاهم إيه جوايا
إرجع تاني لمعنى الآيه
لو إحنا لنفسنا غيرنا
ربِنا واعد هيغيرنا
دا اللي زمان إتعلم مِنا
إتقدم و إحنا إتأخرنا
ما أحنا كمان طولنّا ف نومنا
و لا عايزين حد يصحينا
فأنا هتغيَّر و إنتوا معايا
من جواكوا و من جوايا
و خطوه بخطوه تهون مشاوير
نوصل فيها لأحلى نهايه
يالا قَوام كفايانا تأخير
دا التغيير محتاج لبدايه

0
0
0
s2smodern