بحبك يا مصر - الأكثر قراءة

ميتين و خمسين عسكري

الزيارات: 851
تعطيل النجومتعطيل النجومتعطيل النجومتعطيل النجومتعطيل النجوم
 

ميتين و خمسين عسكري

بني آدم .. إنسان

أعدمهم المفتري

الصهيوني الجبان

يا ضلوعي إتكسري

يا دموع سيلي كمان

يا مشاعري إتأثري

هزي كل الكيان

دا أنا كاره منظري

زي ما أكون حد خان

عايزك تتفجري

ياحروفي كما بركان

و يا كلمه حرة عبري

عن إحساس الهوان

و على قد متقدري

و لآخر الإمكان

عنها ذنوبي كفري

دا اللي هيسكت مدان

و إياكي دقيقة تفكري

تسميهم جيران

أو لحظة واحدة تبرري

و تقولي دا كان زمان

دا أتاري الجرح طري

و كأنه لسه الآن

و إنت يا نفسي إتحسري

و إعلني الأحزان

و بلدي يا غالية إتحرري

و إعدلي تاني الميزان

ميتين و خمسين عسكري

ميتين و خمسين راجل من رجالك

من خيرة شبابك

ميتين و خمسين حلم من أحلامك

من عدد أيامك

ميتين و خمسين يحكي عنهم ترابك

و يقول و يشهد ع اللي نابهم و اللي نابك

إيه بس يابلدي جرالك؟

معقوله ما كانوش ف حسابك؟

معقوله تاهوا عن خيالك؟

معقوله فاتحه لِلقتلَّه بيبانك؟

معقوله قابله يبقوا من زوارك؟

طب إمتى هينور نهارك؟

هيعدي إمتى ليل مِعَتِّم كُحل حالك؟

هتردي إمتى و تقوليلي مالك؟

و إزاي رضيتي بمُر حالك؟

إزاي موافقة إن دول يبقوا جيرانك؟

مش دول يابلدي

أرجوكي ردي

و إن كنت ناسيه تاني عدي

و ما بين كشوفك دوري

و إتذكري

ميتين و خمسين عسكري

بني آدم ..إنسان

أعدمهم المفتري

الصهيوني الجبان

0
0
0
s2smodern