بحبك يا مصر - الأكثر قراءة

الأستاذ فتح الله

الزيارات: 995
تعطيل النجومتعطيل النجومتعطيل النجومتعطيل النجومتعطيل النجوم
 

 

كان الشغل بتاعه

جنب محل أبويّا

كنت بقوله يا عمي

و إبنه كأنه أخويّا

الأستاذ فتح الله و أبويّا

كانوا صحاب

كانوا حبايب

كانوا تقريباً زي إخوات

يعني مافيش مغلوب و لا غالب

و لا كان بينهم فيه عداوات

كان أستاذ فتح الله

يبادلنا الزيارات

و ياما كتير أوقات

جمعتنا مناسبات

لو نفرح نلقاهم

جايين لينا يهنوا

و إحنا كمان وياهم

الأحزان نقسمهم

ياما كتير زرناهم

و صلى أبويّا ف بيتهم

و لا حسيتش معاهم

فرق ما بينا و بينهم

كنت صغير فاهم

دينّا صحيح غير دينهم

و كان أبويّا يقول عالم

ربك إيه مصايرهم

ما تكونش يا واد ظالم

و إوعى تخون عشرتهم

من حوا و من آدم

زيك الله خالقهم

و أنا عمري ما هنساهم

و بخير لسه فاكرهم

و الأستاذ فتح الله

عيلتهم

كانوا أعـز جيران

الأستاذ فتح الله دا كان

راجل طيب

كان إنسان

كان ما يحبش يكدب

و لا صاحبه ف يوم خان

و كان مع أبويّا يدوِّن

حسابات الدكان

و الأستاذ فتح الله كمان

كان راجل مُتديِّن

كان بيخاف من ربه

و زي أبويّا حنيِّن

كان أبيَّض لون قلبه

و لا كان وشه يلوِّن

عدى العُمر و فات

من غير و لا خلافات

و طبيعة الحكايات

فيها تملي آهات

و كدا بهدوء و سكات

فاتنا أبويا و مات

الأستاذ فتح الله

جه يعزيني و ياخد

زيي معايا عزاه

شُفت قصادي أنا واحد

حزن الدنيا ملاه

ما بينطقش و ساكت

منظر مش هنساه

أول مره دي كانت

فيها أشوفُه حزين

و زيِي لاقيتهُم سالت

منه دموع العين

كان جواه يتألم

و نبرة صوته أنين

مش قادر يتكلم

إفترقوا الإتنين

و بعد يدوب سنتين

بيتهُم راخر ضلم

دامت يعني لمين؟

بس ياريت نتعلم

دنيا و ليها فايتين

برضُه بأمر المولى

من بين العايشِين

مات أستاذ فتح الله

زعلت كل الحته

مش أنا بس لوحدي

اللي دموعها عينيّا

نزلت تلسع خدي

تبقى إزاي بقى ديَّه

مين يرضاها يا بلدي؟

تيجي الناس التانيه

الطمعانه ف أرضي

تجعَل فُرقه ما بينا

أنا و جيراني و صاحبي

طول عمرنا و سنينا

و إحنا نقول بتحدي

إخوات في البشريه

و بينا تلاحم شعبي

و قلوبنا مصريه

المسلم و القبطي

و الأستاذ فتح الله

ساكن لسه ف قلبي

شاهد تسجيل حي للقصيدة

0
0
0
s2smodern