بحبك يا مصر - الأكثر قراءة

ماشي أهز ف راسي

الزيارات: 1175
تعطيل النجومتعطيل النجومتعطيل النجومتعطيل النجومتعطيل النجوم
 

ماشي أهز ف راسي

و أضرب كفي بكفي

أبكي بعين إحساسي

و أمصمص ف شفايفي

بلدي إتملى بمآسي

من قدامي و خلفي

إتقطعِت أنفاسي

و تعبت مني عواطفي

على أهلي و على ناسي

و صحابي و معارفي

على جيل قدرُه يقاسي

و ف وطنه يكون منفي

صيفُه مافهش شماسي

و لا في الشتا مِدَّفِي

بقى يسكُن ف نواصي

و بيتجوِّز عُرفي

ف نهار و لا تماسي

نور أحلامه مطَّفي

دا المُحتَّل الغازي

منا و فينا آهو مخفي

شلته حاجزه كراسي

فوق كتفك مع كتفي

بِيصقفوا لِغوازي

بِيعَروا المتخفي

و مقاسك و مقاسي

يلبس توبه المرفي

و يفوت عمره تعازي

و بحر دموع ما يكفي

و أنا مش قصدي سياسي

دا جنان ربنا يشفي

و غصبِّن عني أنا ماشي

ماشي أهز ف راسي

و أضرب كفي بكفي

أبكي بعين إحساسي

و أمصمص ف شفايفي

0
0
0
s2smodern