بحبك يا مصر - الأكثر قراءة

فكرتني بيها

الزيارات: 776
تعطيل النجومتعطيل النجومتعطيل النجومتعطيل النجومتعطيل النجوم
 

فكرتني بيها مع إني ما نستش

رجعتني ليها و كأني ما مشتش

نزلت دموعي مسحتها

عارف لقيت إيه تحتها ؟

لسه دموعي القديمه

على خدودي منِشفِتشِ

من ذكريات أليمه

و لا جميله ؟ معرفش

و دموع بتجيب ف دموع

تكتب على خد رجوع

و كلام ع الخد التاني

بِيقول إنها واحشاني

واحشاني شوارع بلدي

و ناسها و كل جيراني

و وحشني قعاد القهوه

و شاي مخصوص علشاني

واحشيني صحاب مش عارف

فين أراضيهم

و لا عارف إمتى و فين

أنا ممكن أشوفهم تاني

واحشيني أحباب بتمنى ألاقيهم

من بعد فراقنا سنين

بقوا هنا واقفين قدامي

صدقني دا حتى الدوشه هناك واحشاني

مشتاق لتراب حواريها أما إتمشىَ

لصوت الشواكيش في الورشه

خناقات طوابير العيش

و العرق النازل من عسكري في الجيش

و أيام الطيش

مش عارف مالها ساعات الغربه ما بتِمشِيش

عمالي أحسبها و لسه الناتج ما ظهرلِيش

من نفسي أستغرب و أسألها

و جوابها ما يوصلنِيش

ليه كل ما أحاول أقرب

أرجع تاني أتغرب

و أهل و أحباب ملاقيش

ملعون أبو قصر بعيد عن مصر

و أنا فيه متغرب واحداني

أنا مصر معايا ف كل حِكايه

و طول ما أنت بتنطق يا لساني

دا أنا قشه يا مصر ف بُعدك تقسمني

و ف قُربك مارد بلقاني

ف الغربه أنا عايش و لكني

مش عارف غيرك عنواني

دا أنا شارب مية نيلك

وأنا لوني الداكن من طينك

أنا عايز أجيلك ـ أحكيلك

أمسحها دموعي ف منديلك

دا أنا عايش تايه من غيرك

و لا ناكر فضلك و لا خيرك

مِستنى رسايل مع طيرك

تقوليلي وحشتِّك .. فاكراني

و لا أنت نسيتي و بايعاني؟

كدا قد ما أحبك حاباني

و لا أنت خلاص مش عارفاني؟

مع إن أنا غيرك معرفش

و بحبك حب ميوصفش

فكرتني بيها مع إني ما نستش

رجعتني ليها و كأني ما مشتش

0
0
0
s2smodern