بحبك يا مصر - الأكثر قراءة

ولاد مصر

الزيارات: 1046
تعطيل النجومتعطيل النجومتعطيل النجومتعطيل النجومتعطيل النجوم
 

إحنا ولاد مصر المحروسه .. و مالناش مثيل

مصر أم الدنيا بدون كوسه .. و بدون تهليل

مصر اللي تملي عروسه .. و عريسها النيل

إحنا الفوانيس اللي إتقادت .. في ضلام الليل

و إحنا الأحاسيس اللي إتقالت .. شعر و مواويل

و إحنا اللِكتاف اللي ما تعبت .. و لا يوم م الشيل

و إحنا اللِمخاخ اللي إخترعت .. و فيه ألف دليل

إحنا اللي بنسلك في الزحمه .. و بناكل فول بدل اللحمه

بنربي الكتاكيت في دولاب .. و نحط مقشة قصاد الباب

و العيش على كل رصيف .. و الجزمه ف رف نضيف

و عشان الدم خفيف .. نصنا عيان بالسكر

و النص التاني أليف .. في المم يدوب بيفكر

و أول ما بييجي الصيف .. البحر بحاله بيتعكر

و عشان جوانا نضيف .. على طول نضحك و نكركر

و بننسى مرار إمبارح .. و قلوبنا تملي تسامح

و إن خدنا معاد مع بكره .. دايماً بنروح متأخر

و أساتذه كبار على فكره .. إن إحنا ننام و نشخر

إنما للغير بنساعد .. و بنخدم قد ما نقدر

و كرمنا حقيقي و زايد .. و محدش ليه يتصور

و على طول هتلاقي موالد .. بتلم كبير و صغير

و العُرف بتاعنا السايد .. إننا ع الدوشه ندور

و الأمر المعروف و الثابت .. إن إحنا شعب مسكر

و لا يكرهناش غير واحد .. نسي مصر و خيرها إتنكر

أو واحد قلبه الجاحد .. قلل من قيمة الأزهر

إحنا ولاد مصر و حكاويِنا .. ما فيهاش حكايه ممله

و بنلعب دومنه و كوتشينه .. و كمان حريفة طاوله

ع القهوه هناك تلاقينا .. واخدين ترابيزه مقاوله

هات يالا يا زهر الدُش .. طلعت شطرنج متفرقش

من أي وزير مش بنكش .. و الواد و الكُومي يقش

و البنت عروسه ف حنتور .. ف أجدعها ميدان بيلف

لو ما أتعطلش مرور .. مش عايزه خلاص تتزف

و أول طلبات القايمه .. و على راسها قبل الدش

تليفون محمول ما هي ناويه .. من غيره معاه ما تعش

و أصعب و أهم قرار .. معازيمهُم يبقوا كتار

و الشرط إنها تخـتار .. كل الأجهزه و الفرش

و كأن فيه بينهُم تار .. مش سوا راح يبنوا العش

و العيله تقيد النار .. فيقولوا منتجوزش

عش الزوجيَّه آهو طار .. و دا كله بسبب القرش

إحنا ولاد مصر بجد .. و مش بهزار

عندنا سوق جمعه و سوق الحد .. و سوق لخضار

و حقوقنا الضايعة مالهاش حد .. و ما تجيبهاش أخبار

إنما دماغتنا ضد الكسر .. و غضبنا طوفان ـ إعصار

و إن يوم فاض بينا الصبر .. الدنيا تولع نار

إحنا ولاد مصر و من شمسها .. بشرتنا سمار

إحنا ولاد مصر بنكتبلها .. دواوين أشعار

إحنا ولاد مصر و بنحبها .. بليل و نهار

إحنا ولاد مصر و مين زيها .. بلد الأحرار

إحنا ولاد مصر و بينا بدإت .. تواريخ و زمان

و إحنا ولاد مصر اللي إترسمت .. بأجمل ألوان

إحنا ولاد مصر و ليها شهدِّت .. كل الأديان

و إحنا ولاد مصر اللي إتذكرت .. جوا القرآن

0
0
0
s2smodern